काठमाडौं, १२ साउन । नयाँ शक्ति नेपालले आफ्नो पार्टीका सम्पूर्ण अभियन्ताहरुलाई देशभर बाढी र पहिरोपीडितहरुको उद्धारमा खटिन निर्देशन दिएको छ । पार्टीका प्रवक्ता खिमलाल देवकोटाद्वारा बुधबार जारी विज्ञप्तिमा भनिएको छ, ‘विनाशकारी भूकम्प, नाकाबन्दी, महंगी र कालोबजारीसहित राजनैतिक अस्थिरता एवम् कुर्सी तानातानको संसदीय फोहरी खेलबाट आक्रान्त जनता फेरि एकपटक बाढी पहिरोको मार खप्न बाध्य भएका छन् ।’ विज्ञप्तिमा अगाडि भनिएको छ, ‘वर्षात्को समय दिनहुँ बाढी पहिरोका कारण कैयन धनजनको क्षतिका खबरहरु आइरहेका छन् । ती दुःखद घटनाबाट हामी मर्माहत भएका छौं ।’

नयाँ शक्तिले यस प्राकृतिक विपत्तिको दुःखद घडीमा आम जनतालाई धैर्य धारण गर्दै विपत्तिको मिलेर सामना गर्न अनुरोध गरेको छ भने जनताको पीडाको सम्बोधन गर्न राज्यका निकायहरु संवेदनशील भएर लागि पर्न आग्रह गरेको छ । ‘वैकल्पिक राजनीतिक शक्तिका रुपमा उदाएको नयाँ शक्ति पार्टी नेपालका सम्पूर्ण पार्टी कमिटीहरुका अभियन्ताहरु, समर्थक र शुभचिन्तकहरु जनताको यो पीडाको घडीमा राहत र उद्दारको कार्र्यमा तदारुकताका साथ जुट्न र जनताको दुःख र पीडामा नयाँ शक्ति साथमा छ भन्ने अनुभूति दिलाउने कार्ययोजना निर्माण गरी राहत र उद्दारको कार्यमा सक्रियताका साथ जुट्न हार्दिक आग्रह गरिन्छ,’ विज्ञप्तिमा भनिएको छ ।