काठमाडौं, १० साउन – प्रधानमन्त्री केपी ओलीले पदबाट राजीनामा दिएर नयाँ सरकार गठनका लागि मार्गप्रशस्त गरेपछि कांग्रेस र माओवादी केन्द्रले नयाँ सरकार गठनका लागि कसरत थालेका छन्। कांग्रेस–माओवादीले नयाँ गठबन्धनका प्रस्तावित प्रधानमन्त्री प्रचण्डलाई सहमतीय सरकार गठनकालागि पहल थाल्न निर्देशन दिएका छन्।

नयाँ बन्ने प्रचण्ड नेतृत्वको सरकारमा एमाले सहभागी नहुने भएपछि तत्काल राष्ट्रिय सहमतिको सरकार भने नबन्ने भएको छ। बहुमतीय सरकार निर्माणको कसरत सुरुभएपनि सहमतीय प्रयास भने नछोड्ने माओवादीले जनाएको छ।

यसैबीच माओवादी र कांग्रेसबीच मन्त्रालयको बाँडफाँडसमेत भइसकेको छ। सात बुँदे सहमति लगत्तै दुई दलबीच मन्त्रालयको बाँडफाँड भएको हो। स्रोतका अनुसार कांग्रेसले १३ र माओवादीले ९ मन्त्रालय लिने मोटामोटी सहमति भएको छ।

३० मन्त्रालय कांग्रेस माओवादीले २२ मन्त्रालय लिएर बाँकी ८ मन्त्रालय अन्य साना दललाई छुट्याउने तय भएकोमा सरकारमा सहाभागी हुने राजनीतिक दलको संख्या बढेका कारण केही तलमाथि हुने भएको हो। दुई महत्वपूर्ण मन्त्रालयमध्ये कांग्रेसले गृह र माओवादीले अर्थ मन्त्रालय लिने सहमति भएको स्रोतले जनाएको छ।