श्रावण ९, २०७३- काठमाडौं विश्वविद्यालयको मेडिकल स्नातकोत्तर (एमडी/एमएस) प्रवेश परीक्षामा अख्तियार दुरुपयोग अनुसन्धान आयोगले हस्तक्षेप भएको र डा. गोविन्द केसीलाई ‘पागल’ भनेको भन्दै अख्तियारको केन्द्रीय कार्यालय घेर्न पुगेका आन्दोलनकारीलाई प्रहरीले लाठी प्रहार गरेको छ ।

आइतबार बिहान डा. केसीको समर्थनमा आयोजित अख्तियार घेराउ कार्यक्रममा सहभागीलाई प्रहरीले धरपकड गरेको हो । आन्दोलनमा आन्दोलनकारी र प्रहरीबीच ठेलमठेल भएको थियो । भाटभटेनीबाट अख्तियारको कार्यालय घेर्न जान लागेका केही आन्दोलनकारीलाई प्रहरीले लाठी प्रहार गरेको छ । लाठी प्रहारबाट करिव आधा दर्जन आन्दोलनकारी घाइते भएका छन् ।

यसैगरी प्रहरीले करिव एकदर्जन आन्दोलनकारीलाई नियन्त्रण गरेर नगर प्रहरी प्रदर्शनीमार्गमा राखिएको छ ।

डा. सागर पोखरेल, बद्री अर्याल, बिषद दाहाल, मिर्जा सिद्दिकी, बिक्रम ओली, पदम जोशी चिकित्सा शिक्षा शास्त्रका विद्यार्थी र पुकार बम लगायतका अन्य प्रहरी नियन्त्रणमा छन् ।

नगर प्रहरीमा रहेका १० डाक्टरहरुले निषेधित क्षेत्र भन्दा पहिले नै किन पक्राउ गरेको हो भनेर भित्रै अनसन सुरु गरेका छन् ।

महानगरीय प्रहरी प्रमुख विक्रमसिंह थापाले बाटोमा सवारी आवागमनमा अवरोध पुर्‍याएपछि नियन्त्रणमा लिइएको बताएका छन् ।

नियन्त्रणमा लिइएको आन्दोलनकारीलाई विनाशर्त तत्काल रिहा गर्न माग गर्दै डा. केसीका समर्थहरुले नारा जुलुस गरिरहेका छन् ।

@ एकान्तिपुर |