आषाढ – २५ , याम्बु  । तामाङ भाषाको १५४ औं साहित्यिक श्रृंखला सम्पन्न भएको छ । तामाङ डाजाङ साहित्यिक संस्थाले काठमाडौंको प्रदर्शनी मार्गमा आज ग्योइकाइ गेताङको १५४ औं श्रृंखला सम्पन्न गरेको हो । कार्यक्रममा साहित्य वाचनका साथै भारत कालिङपोङका ८८ वार्षिय लेखक डी.बी. (धनबहादुर) योन्जनसंग साक्षात्कार समेत भएको थियो ।

उक्त ग्योइकाइ गेताङमा नेत्र तामाङ, मुक्तान थेबा, मनिकलाल घिसिङ, हिरामाया घिसिङ, टंकलाल दोङ, प्रयत्न वाइबा, निकिता वाइबा, रन्जना मोक्तान, संगीता थिङ, धनकुमारी घिसिङ, रचना मोक्तान, लगायतले तामाङ भाषामा कविता, गजल तथा मौलिक गीत प्रस्तुत् गरेका थिए ।
लेखक (धनबहादुर) योन्जनले २०६६ सालमा तामाङ–नेपाली–अंग्रेजी भाषामा तामाङ लिपि सहितको शब्दकोष प्रकाशन गर्नु भएको थियो । त्यसैगरी तामाङ लिपि वर्णमाला, तामाङ संख्या प्रणाली (बालबालिका पुस्तिका) समेत प्रकाशन गर्नु भएको छ ।

कार्यक्रममा लेखक योन्जनले तामाङ डाजाङले तामाङ भाषा र साहित्य संरक्षण तथा विकासका लागि चालेको अभियान प्रति खुशी व्यक्त गर्दै निरन्तरताको शुभकामना दिनुभयो । उहाँले नेपालमा तामाङ युवाहरुको सक्रियता देखेर आफु प्रभावित भएको बताउँदै भारतको दार्जलिङ, सिक्किम, आसाम र कालिङपोङमा भाषा बचाउन विभिन्न प्रयास र मातृभाषामा शिक्षाको ब्यवस्था भएपनि नयाँ पुस्ताको लगाव कम रहेको बताउनुभयो । भाषा मर्यो भने भाषासंगै ज्ञान र पहिचान समप्त हुने भएकोले भाषा बचाउन अपर्यहार्य रहेको उहाँको भनाई थियो । भारतभुमिमा रहेर तामाङ भाषा बचाउन र लिपिको प्रयोग गर्न आफुहरुले निक्कै ठुलो संर्घष गर्नु परेको अनुभव सुनाउदै लेखक योन्जनले नयाँ पुस्ताले आफ्नो भाषा, संस्कार, संस्कृति, संरक्षण गर्नका लागि भित्री आत्म देखिनै लाग्नुपर्नेमा जोड दिनुभयो ।

कार्यक्रममा तामाङ साहित्य एकेडेमीका कुलपति अमृत योन्जन तामाङले लेखक योन्जनको ब्यक्तित्वबारे चर्चा गर्दै तामाङ शब्दकोष र तामाङ संख्या प्रणाली सम्बन्धि पुस्तक महत्वुपर्ण रहेको उल्लेख गर्नुभयो । यस्तै लामा टी ग्याल्छेनले तामाङ भाषा संरक्षणका लागि डाजाङले गर्दै आएको अभियानको ठूलो हात रहने भन्दै भाषा संरक्षणका साथै लिपिको निक्र्योलमा तामाङहरु पुग्न जरुरी रहेको समेत बताउनु भयो ।

@ तामाङ डाजाङ ला  फेसबुक ग्यामसे  |