काठमाडौं–सरकारले विभिन्न धार्मिक तथा जातीय संघ संगठनलाई राज्यको ढुकुटीबाट लाखौं रकम वितरण गरेको छ । मन्त्री परिषद्बाटै निर्णय गराएर सरकारले ती धार्मिक तथा जातीय संघ, संगठनलाई ३० लाख रुपैयाँ रकम वितरण गरेको हो ।

चालु आर्थिक बर्षको जेठमा यो रकम वितरण भएको अर्थ मन्त्रालयले जनाएको छ । मन्त्रालयका अनुसार मन्त्रीपरिषद्कै निर्णयमा विश्व हिन्दु महासंघलाई मात्रै २० लाख रुपैयाँ राज्य कोषबाट दिइएको छ । संविधानमा धार्मिक निरपेक्षता व्यवस्था गरिएपनि एउटा धार्मिक संगठनलाई राज्यले यति ठूलो रकम दिएको हो । सरकारले आर्थिक सहायताका नाममा उक्त रकम उपलव्ध गराएको छ ।

यस्तै, नेपाल तामाङ घेदुङ राष्ट्रिय कार्यकारिणी समिति, किराँत राई यायोक्खा लगायतलाई पनि पर्यटन मन्त्रालय मार्फत रकम दिने निर्णय सरकारले गरेको छ । तामाङ घेदुङलाई ४ लाख, किराँत राई यायोक्खालाई ४ लाख र राजबोध उपत्यका सम्पर्क परिवारलाई २ लाख रुपैयाँ दिइएको छ । यो रकम अर्थ मन्त्रालयले गत जेठमै संस्कृती, पर्यटन तथा नागरिक उड्यन मन्त्रालयका नाममा निकासा दिइसकेको छ ।