सिड्नी—नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को अस्ट्रेलिया भ्रमण रोक्न न्यु साउथ वेल्सका प्रिमियर समक्ष नै उजुरी परेको खुलासा भएको छ । दाहालको अस्ट्रेलिया भ्रमण औचित्यपूर्ण नभएको भन्दैं पुनःविचार गर्न माग गरिएको एक गोप्य पत्र अस्ट्रेलियाको एमएनटीभीले सार्वजनिक गरेको छ ।

२५ जुनमा सिड्नीमा हुने जनप्रगतिशील मञ्च अस्ट्रेलियाको अधिवेशलाई सम्बोधन गर्न दाहाल बुधबार अस्ट्रेलिया उड्ने तय भएको थियो । तर, अन्तिम समयमा दाहालले देशको परिस्थिती र पार्टीको आन्तरिक कामलाई कारण देखाउँदैं भ्रमण स्थगित गरेका थिए । दाहालको भ्रमणका लागि अस्ट्रेलियामा जनप्रगतिशील मञ्चले अन्तिम तयारी समेत थालिसकेको थियो ।

तर, दाहालले एकाएक अन्तिम समयमा भ्रमण रद्ध गरेका थिए । उनको भ्रमण रद्ध हुनुका पछाडि अहिले उक्त पत्रलाई पनि कारणका रुपमा हेर्ने थालिएको छ ।

एक नेपाली मूलका अस्ट्रेलियन नागरिकले न्यु साउथ वेल्सका प्रमियर माइक बेयर्ड समक्ष हालेको उक्त उजुरीमा दाहाललाई १५ हजार मानिस मारेको, सिभिल वारको कमाण्डर, १ लाख ५० हजार मानिस घरबारबिहीन बनाएको तथा ३७ मुद्धामा विश्वका विभिन्न अदालतमा मुद्धा चलिरहेको ब्यक्तिको अस्ट्रेलिया भ्रमण के औचित्यपूर्ण होला त भनी प्रश्न गरिएको छ ।

‘प्रचण्डको अस्ट्रेलिया भ्रमण आफ्ना अतिवादी विचारधारा प्रचार गर्नका लागि तथा हिंसालाई प्रोत्साहन गर्नका लागि र समुदायमा विभाजन पार्ने खालका हुनेछन्,’ अस्ट्रेलियास्थित एमएनटिभीले सार्वजनिक गरेको उक्त उजुरीमा भनिएको छ, ‘काठमाडौंको लाजिम्पाटमा सुविधासम्पन्न महलमा बस्दैं आइरहेका प्रचण्डका कारण उनका केही धनाढ्य छिमेकीहरु समेत डरत्रासमा बाँचेका थिए ।’

यस्तै उजुरीमा अगाडि भनिएको छ, ‘उनको महलको भाडा प्रतिमहिना ९ सय डलर (झण्डै १ लाख नेपाली) हुन्छ । तर, नेपालको प्रतिब्यक्ति आय हेर्ने हो भने मासिक सय डलरभन्दा कम छ ।’
दाहाललाई झण्डै १० मिलियन डलर बराबर भ्रष्टाचार गरेको र आफ्नो मात्र स्वार्थ पूरा गरेको उजुरीमा बताइएको छ । ‘अस्ट्रेलियाको नियम र कानुनलाई सम्मान तथा विश्वास गर्ने हैशियतले म अस्ट्रेलियन सरकारलाई प्रचण्डको अस्ट्रेलिया भ्रमणप्रति पुर्नविचार गर्न आग्रह गर्छु,’ इमेलमा लेखिएको छ, ‘हजारौ मान्छेको ज्यान जानुको कारण बनेका तथा साधारण जनतालाई अंगभंग बनाएका तथा देशमा डर, त्रासको भय बनाइ नेपालीहरुलाई देश छाड्न बाध्य बनाएका प्रचण्डको भ्रमणप्रति पुन विचार गर्न आग्रह गर्छु ।’

उक्त उजुरीमाथि जवाफ लेख्दैं अफिस अफ दि प्रिमियर अफ न्यु साउथ वेल्सका करेसपोन्डेन्स म्यानेजर गेल मिचेलले पुष्पकमल दाहालको भ्रमणबारे चासो देखाइएकोमा धन्यवाद दिएका छन् । ‘तपाईंको इमेलका लागि धन्यवाद मैले प्रिमियरमा रहेको हैशियतले यो तपाईंको कमेन्टको प्रतिक्रिया दिएको छु,’ इमेलमा भनिएको छ, ‘तपाईले उठाएको विषयले एनएसडब्ल्यु पुलिसलाई ध्यानाकर्षण गराउनेछ ।’

उनले अगाडि लेखेका छन्, ‘मैले आजै यस पत्रलाई डेपुटी प्रिमियर एण्ड मिनिष्टर फर जष्टिस एण्ड पुलिसलाई फरवार्ड गरिदिइसकेको छु । आशा छ, प्रहरीले यसप्रति ध्यानाकर्षण गर्नेछ ।’

उनले अस्ट्रेलिया प्रवेशका लागि प्रशासनिक काम फेडरल गभर्मेन्टले गर्ने हुँदा उनीहरुलाई समेत यो पत्र फरवार्ड गरिएको बताएका छन् ।

अस्ट्रेलियास्थित नेपाली दूतावासले भने प्रचण्डको उच्चस्तरीय भेटघाट मिलाउन नसकिएका कारण भ्रमणप्रति उत्साहित हुन नसकेको हुन सक्ने जनाएको छ । ‘यहाँको चुनावका कारण उच्च तहको भेटघाट भने मिलाउन सकिएन । त्यस कारण भ्रमणका लागि त्यति उत्साही नभएको हुन सक्छ,’ प्रचण्डको उच्चस्तरीय भेटघाट मिलाउने सक्रिय बनेका नेपाली राजदूतावास अस्ट्रेलियाका डेपुटी चिफ अफ मिसन राजेन्द्र पाण्डेले एमएनटीभीसँग भनेका छन् ।