काबुल घटनाले सपना चकनाचुर
काठमाडौँ, असार ८ गते । काबुल घटनाबाट छोरा गुमाउनु परेको खबर सुनेदेखि नुवाकोट कल्याणपुर निवासी मधुसूदन कोइरालाका बुबाआमाको आँखा ओभाउन सकेका छैनन् ।
सोमबार काबुलमा बम विस्फोटमा नेपालीको मृत्यु भएको खबर सुन्नासाथ काबुलमा सम्पर्क गरेको कोइराला परिवारले त्यहाँ रहेका आफन्तबाट मधुसूदन सदाका लागि बिदा हुनुभएको दुःखद समाचार पाएको थियो ।
गत वर्षको विनाशकारी भूकम्पमा छोरा र छोरी गुमाएपछि तीन वर्षको काबुल बसाइ छोडेर नेपाल फर्किनुभएका कोइराला एक महिना अघिमात्र पुनः अफगानिस्तान गएको काका रामचन्द्र कोइरालाले बताउनुभयो ।
घरमा बुबाआमा, श्रीमती, दाजुभाइ सबैजना भए पनि पाँच छोराछोरीमध्ये एक्लो छोरो र छोरी गुमाएपछि मधुसूदन निकै दुखी बन्नुभएको थियो । काका रामचन्द्रका अनुसार त्यही दुःख बिसाउन उहाँले ‘सन्तानको वियोग’ लोकगीतसमेत सिर्जना गर्नुभएको थियो । वृद्ध बाआमाको इच्छाअनुसार काठमाडौँको धर्मस्थलीमा एकतले घर बनाउनुभयो । सोही घरमा तला थप्ने उद्देश्यअनुरूप मधुसूदन पुनः अफगानिस्तान जानुभएको थियो । अफगानिस्तान पुगेको एक महिनामै उहाँको मृत्यु भयो ।
त्यस्तै काभ्रे ठूलो पर्सेलका ४४ वर्षीय चन्द्रबहादुर रानामगर पनि सामान्य आर्थिक अवस्था भएको परिवारका मूली हुनुहुन्थ्यो । सन्तान हुर्किंदै जाँदा प्रहरीको जागिरले खर्च धान्न गाह्रो भएपछि हवल्दारको जागिर छोडेर अफगानिस्तान जानुभएको थियो । माओवादी द्वन्द्वकालमा पनि जागिर नछोडेका चन्द्रबहादुरले अफगानिस्तानमा सुरक्षागार्डका लागि आकर्षक तलबकोे अफर आएपछि राजीनामा दिनुभएको थियो । प्रायः बिहान बेलुका ड्युटीमा जानुअघि परिवारसँग फोन सम्पर्क गर्दै आउनुभएका चन्द्रबहादुरले घटनाको दिन भने फोन गर्नुभएको थिएन ।
फोनको प्रतीक्षामा बसेको परिवारले एक्कासि उहाँको मृत्युको खबर पायो; जुन घटना सुरुमा परिवारका लागि अपत्यारिलो बनेको थियो । यतिखेर चन्द्रबहादुरको परिवारमात्र होइन, पूरै गाउँ शोकमा डुबेको छ ।
लमजुङ अर्चलेबोट सखारका ५१ वर्षीय अमृत थापा पनि बिदामा घर आएर दुई हप्ता अघिमात्र अफगानिस्तान जानुभएको थियो । परिवारले अब नजानुस् भन्दा पनि आकर्षक तलब सुविधाका कारण पुनः अफगानिस्तान जानुभएका थापाले त्यहाँ आफूहरूको सुरक्षाव्यवस्था राम्रो रहेको परिवारलाई बताउनुभएको थियो । अफगानिस्तान गएको २१औँ दिनमा आत्मघाती बम विस्फोटमा उहाँको मृत्यु भएको हो ।
यस्तै पर्वत कार्कीनेटाका नवीनसिंह क्षेत्री र कुनाचौरका वीरबहादुर सुवेदी क्षेत्रीको परिवार पनि शोकाकुल बनेको छ । बुटवल देवनगरका ४३ वर्षीय जितेन्द्रसिंह थापा एउटा घर बुटवल र अर्को घर काठमाडौँमा बनाउने सपना बुनेर अफगानिस्तान जानुभएको थियो, जुन पूरा हुन पाएन ।
नुवाकोट देउरालीका डम्बरबहादुर तामाङ र राईसिंहका लीलाबहादुर गुरुङको परिवार पनि अन्य पीडित परिवार जस्तै शोकमा डुबेको छ । मृतक अधिकांशको इच्छा प्रवासमा दुःख गरेर छोराछोरी पढाउने, हुर्काउने र सहरमा घर बनाउने रहेको पाइन्छ ।
