कुमार लिङ्देनलाई हटाएर लिम्बुवान् पार्टीको नेतृत्वमा सञ्जुहाङ पालुङ्वा
झापाः सङ्घीय लिम्बुवान् पार्टी नेपालको अध्यक्षबाट कुमार लिङ्देनलाई हटाएर सञ्जुहाङ पालुङ्वाले नेतृत्व लिएका छन् ।
अध्यक्ष लिङ्देनसँग असन्तुष्ट पार्टीका बहुमत केन्द्रीय पदाधिकारी तथा सदस्यको भेलाले लिङ्देनलाई अध्यक्ष पदबाट हटाएर पालुङ्वालाई नेतृत्व दिएको हो ।
पालुङवा अग्रज लिम्बुवान् नेता मानिन्छन् । लिङ्देनसँग असन्तुष्ट पार्टीका केन्द्रीय पदाधिकारी र सदस्यको भेलाले आयोजक समिति निर्माण गर्दै त्यसको जिम्मेवारी पालुङ्वालाई दिएको हो ।
पालुङ्वा संयोजक रहेको समितिले पत्रकार सम्मेलन गरेर चारबुँदे निर्णय समेत सार्वजनिक गरेको छ । पत्रकार सम्मेलनमा संयोजक पालुङ्वाले लिम्बुवान स्वायत्ता प्रदेश प्राप्तिको आन्दोलनमा सबै एकता पक्षधरलाई समेटेर अघि बढ्ने प्रतिबद्धता व्यक्त गरे ।
कार्यक्रममा लिम्बुवान पार्टीका सर्वोच्च नेता मानिने कमल छाराहाङ लगायतको उपस्थिति थियो । मधेस आन्दोलनलाई समर्थन गरेको भन्दै लिम्बुवानभित्र कुमार लिङ्देनको चर्को आलोचना हुँदै आएको थियो ।
अरुण पूर्वका नौ जिल्लालाई लिम्बुवान स्वायत्त राज्य घोषणा गर्नुपर्ने माग गर्दै केही वर्षयता लिम्बुवान आन्दोलन चर्कदै आएको छ । माओवादी विद्रोहबाट औपचारिक रुपमा सुरु भएको लिम्बुवान आन्दोलन पछिल्ला दिनमा लिम्बुवान पार्टीकै रुपमा स्थापित भएको छ ।
लिम्बुवान पार्टी भित्रको विवादले आन्दोलनले ठोस गती लिन नसकेको समाचार अन्नपुर्ण पोस्टमा छ |
