तामाङ डाजाङ साहित्यिक संस्थाको १५३ औं ग्योइकाइ गेताङ र विमोचन सम्पन्न
काठमाडौं, २९ जेठ । तामाङ भाषाको १५३ औं साहित्यिक श्रृंखला सम्पन्न भएको छ । तामाङ डाजाङ साहित्यिक संस्थाले काठमाडौंको प्रदर्शनी मार्गमा आज आयोजना गरिएको ग्योइकाइ गेताङ १५३ औं श्रृंखला हो । कार्यक्रमा साहित्य वाचनका साथै गीति संग्रह र पुस्तक एकै पटक ३ वटा कृति विमोचन भएको छ । दुइ वटा गीतिक्यासेट र तामाङ महिलाको परिचय समेटिएको पुस्तक विभिन्न क्षेत्रका अतिथि महिलाहरुद्धारा संयुक्त विमोचन गरिएको हो । अमृत योन्जन–तामाङको उज्यालो यात्रामा तामाङ महिला, रन्जना मोक्तानको तामाङ मौलिक गीतको एल्बम फापा ह्वाइ र बिशाल सिन्तानको सेलो एल्बम सगुन एकैसाथ विमोचन भएको हो ।
कार्यक्रममा नेकपा माओवादी केन्द्रका सांसद कमला दोङ, वारिष्ठ गायिका तथा तामाङ कलाकार संघका अध्यक्ष इन्दिरा गोले, निबन्धकार कुमारी लामा, तामाङ डाजाङका पुर्व अध्यक्ष मायालु ङेसुर, मातृभाषा साहित्य प्रतिष्ठानका अध्यक्ष सुलोचना मानन्धर, संस्कृति घेदुङका अध्यक्ष प्रेम लो तामाङलगायतले कृतिहरुको बिमोचन गर्नु भयो । उज्यालो यात्रामा तामाङ महिला पुस्तकमा हाल सम्म विभिन्न क्षेत्रमा आफ्नो परिचय बनाएका तामाङ महिला र तामाङ मिथक महिला पात्रहरुको चिनारी समेटिएको छ । पुस्तकमा पन्चयातकाल देखि सशस्त्र जनयुद्धका क्रममा राजनैतिक परिर्वतनका लागि प्राणको आहुति दिएका तामाङ महिला सहिदहरुको बारेमा उल्लेख छ । पुस्तकको बारेमा अनुसन्धानकर्ता कैलाश राईले तामाङ महिलाको तामाङ समाजमा रहेको मान सम्मान र स्थानको उजागर गर्दै महिलाको अवस्था अवगत गराउने काम कृतिले गरेको बताउनुभयो । यसैगरी रन्जना मोक्तानको तामाङ मौलिक गीतको एल्बम फापा ह्वाईमा ५ वटा गीत रहेका छन् भने विशालको पहिलो सेलो एल्बम सगुनमा पनि पाँच वटै गीत समेटिएका छन् । कार्यक्रममा मातृभाषा साहित्य प्रतिष्ठानका अध्यक्ष सुलोचना मानन्धर, निबन्धकार कुमारी लामा, डाजाङका पुर्व अध्यक्ष मायालु ङेसुर, वारिष्ठ गायिक इन्दिरा गोलेलगायतले तामाङ साहित्य तथा समाजका लागि एकै पटक तिन वटा कृति आउनु खुशीको कुरा भएको उल्लेख गर्नुभयो ।
कार्यक्रममा खोजराज गोले, टंकलाल दोङ, संगीता थिङ, रन्जना मोक्तान, आर्दश कुमार थिङ, जमानसिं थिङ, फुर्पा तामाङ, धनकुमारी घिसिङ, अमिर योन्जन, ङेमा गोले लगायतले तामाङ भाषामा कविता, गजल तथा मौलिक गीत प्रस्तुत् गरेका थिए ।@ तामाङ डाजाङको फेसबुक मार्फत |
