जेष्ठ २८, २०७३- व्यवस्थापिका संसदको अन्तराष्ट्रिय सम्बन्ध तथा श्रम समितिले विदेशी अस्पतालको कोमामा रहेका नेपाली कामदारहरुलाई स्वदेश झिकाउन श्रम मन्त्रालयलाई निर्देशन दिएको छ । श्रम विभागका महानिर्देशक, श्रम मन्त्रालयका प्रवक्ता र अन्य सरोकारवालाहरुको बैठकमा समिति सभापति प्रभु शाहले वषौदेखि विदेशी अस्पतालको कोमामा कामदार रहनु राम्रो विषय नभएको बताए ।

शाहले त्यस्ता कामदारलाई जतिसक्दो छिटो स्वदेश झिकाउन मन्त्रालयलाई निर्देशन दिएका छन् । शाहले कान्तिपुरसँग कुरा गर्दै भने, ‘विदेशी अस्पतालको कोमामा रहेको कामदारलाई स्वदेश झिकाउने र उपचारमा पहल गर्न निर्देशन दिएका छौं ।’

मन्त्रालयका प्रवक्ता भरतमणि भूर्तेल वर्षौदेखि विदेशी अस्पतालको कोमामा रहेको नेपाली कामदार ल्याउन परिवारको पहिलो स्विकृति आवश्यक हुने बताउँछन । बिरामीका आफन्तले सहमति नजनाएकै कारण वा उनीहरुले पर्याप्त पहल नगरेकै कारण कोमामा रहेको नेपाली श्रमिकलाई ल्याउन नसकिएको उनी बताउँछन् ।

‘अब परिवारको सहमतिबिना सरकारले ल्याएर राख्न पनि व्यवहारिक रुपमा सम्भव छैन’, प्रवक्ता भूर्तेलले भने, ‘तर राज्य दायित्वबाट भाग्न मिल्दैन । हामी यस विषयमा फेरी छलफल गछौं ।’

श्रम विभागका महानिर्देशक शत्रुघ्न पुडासैनी कोमामा रहेका कामदारलाई नेपाल ल्याउने विषयमा श्रम मन्त्री र श्रम मन्त्रालयका सचिवलाई जानकारी गराउने बताउँछन । उनले कान्तिपुरसँग भने, ‘यो साँच्चै गम्भीर विषय हो ।’

समितिको बैठकमा वैदेशिक रोजगारीमा ब्याप्त ठगीको विषयमा पनि कुरा भएको थियो । बैठकमा श्रम विभागका महानिर्देशक शत्रुघ्न पुडासैनीले दुई वर्षमा विभागमा परेका बैदेशिक रोजगारीसम्बन्धी ठगीका घटना र त्यसमा विभागले गरेको कारबाहीको बिषयमा जानकारी दिएका थिए ।

महानिर्देशकका अनुसार पछिल्लो आर्थिक बर्षका दस महिनामा मात्रै व्यक्तिगत ठगीका चार सय ८२ र संस्थागत ठगीमा एक हजार एक सय ७४ उजूरी परेका थिए । तीमध्ये व्यक्तिगत ठगीका ६७ र संस्थागत तीन सय ५३ उजुरीको निप्टारा लगाइएको थियो ।

विदेशी अस्पतालको कोमामा रहेका नेपालीबारे कान्तिपुरले शृ‌खलाबद्धरुपमा समाचार प्रकाशित गर्दै आइरहेको छ । ती सामग्रीहरु पढ्नुहोस् ।