समृद्धिले पत्रकार सम्मेलनमा भनिन्, ‘अब पहिचान र संघीयताबारे अध्ययन गर्छु’
काठमाडौं, १४ जेठ । एउटा टेलिभिजन कार्यक्रममा ‘राई-लिम्बूहरुलाई हेर्नै मन परेन’ भन्ने अभिव्यक्ति दिएपछि चर्चामा आएकी गायिका समृद्धि राईले बल्ल कुरो बुझेजस्तो गरेकी छन् ।
उनले अब अाफूले पहिचान र संघीयकाबारे अध्ययन गर्ने बताएकी छन् । सामाजिक सञ्जालमा उनलाई बहिष्कार गर्नुपर्नेसम्मको भनाई आइरहेको बेला उनले शुक्रबार किरात राई यायोक्खा कोटेश्वरमा पत्रकार सम्मेलन गरी आफूले उप्रान्त सोचेर मात्रै बोल्ने र पहिचान र संघीयताबारे अध्ययन गर्ने बताएकी किरात राई पत्रकार संघले उल्लेख गरेको छ ।
किरात राईभित्रको वाम्बुले राई समुदायकी उनले अब वाम्बुले राईहरुको बाहुल्य क्षेत्र ओखलढुंगामा गएर वाम्बुले राईहरुको धर्म संस्कृति र भाषाबारे बृतचित्र निर्माण गर्ने प्रतिज्ञा समेत गरेकी छन् ।
‘तिमी को हौ थाहा छैन म चाहिँ नेपाली’ बोलको गीत रेकर्ड गराएका उनी नेपालमा किन पहिचान र अधिकारकाे राजनीति केन्द्रमा अाइरहेकाे छ ? र संघीयता किन आवश्यक छ ? भन्ने विषयमा खासै जानकार नभएको देखिएकी छन् ।
संघीय समाजवादी फोरम नेपालका उपाध्यक्ष रकम चेम्जोङले समेत समृद्धिको अभिव्यक्ति आएपछि उनले यसलाई एकल जातीय राज्य सत्ताले निर्माण गरेको ‘प्रडक्ट’को रुपमा व्याख्या गर्दै फेसबुकमा स्टाटस लेखेका थिए |