काठमाडौं, जेठ ११ । मोड्लिङ र गायन क्षेत्रमा लाग्दै आएकी समृद्धि राईले एक विद्युतीय सञ्चार माध्यमको कार्यक्रममा ‘राई—लिम्बू हेर्नै मन लाग्दैन’ भन्ने शब्द प्रयोग गरेपछि सामाजिक सञ्जालमार्फत सर्वत्र विरोध सुरु भएको छ ।

राईले बीबीसी नेपाली सेवाअन्तर्गतको ‘समाज र राजनीतिबाट नेपाली युवाहरु के चाहन्छन् ? साप्ताहिक साझा सावालमा ३० बर्षभन्दा कम उमेरका युवा युवतीहरुबीच भएको कार्यक्रममा गायिका समृद्धि राईले विवाहको प्रसंगमा ‘राई—लिम्बू हेर्नै मन लागेन’ भन्ने शब्द प्रयोग गरेकी थिइन् ।

उक्त कार्यक्रमको भिडियो र अडियो सार्वजनिक भएपछि सामाजिक सञ्जाल फेसबुक तथा ट्वीटरमा राईको ब्यापक आलोचना सुरु भएको छ । भिडियो सार्वजनिक भएपछि मुलघरे कान्छा लेख्छन् ‘राई लिम्बू समुदायविरुद्ध अपहेलित शब्दको अभिव्यक्ति दिएको कारण तिनले सोही टेलिभिजनबाट माफी माग्नु पर्दछ, नभएपनि भिडियो बनाएर माफी माग्नु पर्दछ ।’

आफ्नो फेसबुक सञ्जालमा छिलिङ किरात लेख्छन् ‘मान्छेलाई चेतना र ज्ञानको कमी भएपछि आफू र आफ्नैलाई नराम्रो देख्छ, धिकार्छ, विचरी समृद्धि राईलाई भएको त्यही हो ।’

देवतार योञ्जन तामाङले समृद्धि राईको अभिव्यक्ति घृणित भनेका छन् । कसैले आफ्नो वंश, आमाबाबुलाई घृणा गर्नेले देशको माया गर्न सक्दैन भनी कडा शब्दको प्रयोग गरेर उनको आलोचना सुरु भएको छ ।

सामाजिक सञ्जालमार्फत चौतर्फी आलोचना आएपछि राईले भने आफ्नो फेसबुक पेजमा माफी मागेकी छन् । म एउटा किरातीको छोरी भएर किरातीलाई कसरी घृणा गर्न सक्छु ? प्रश्न गर्दै नेपाली फरर बोल्न नआएको कारण राई लिम्बूलाई चित्त दुख्ने शब्द प्रयोग भएको प्रति क्षमा मागेकी छन् ।

समृद्धि राई मिस टिन २००६ को सेकेण्ड रणर अफ, सञ्चारकर्मी र गायिका हुन् । भाषा, धर्म, संस्कार, संस्कृतिको विकास, पहिचानसहितको संघीय राज्यको कुरा उठिरहेको बेला कलाकार समृद्धि राईको शब्द पहिचानविरोधी मानसिकताबाट आएको हुनसक्ने अनुमान गर्न सकिन्छ । राईले ‘तिमी को हौ था छैन, म चै नेपाली…, बोलको गीत सुन्न र हेर्न पाइन्छ । गीतमा पहिचानको कुरा छाडेर सवै नेपाली हौं भन्ने भाव झल्किन्छ । @ esamata