काठमाडौँ, ४ जेठ । सूचना तथा सञ्चारमन्त्री शेरधन राईले आमसञ्चार क्षेत्रको विकास र विस्तारका हिसाबले सरकारको आगामी बजेट ‘वाहीवाही’ हुने बताएका छन् । नेपाल आदिवासी जनजाति पत्रकार महासङ्घ (फोनिज) को पहिलो राष्ट्रिय भेलाको उद्घाटन समारोहमा मन्त्री राईले भने –“आगामी बजेटमा सञ्चार क्षेत्रका धेरै कुरा समावेश गरेर ल्याइने छ ।” सञ्चार क्षेत्रलाई ठीक ढङ्गले अघि बढाउन नयाँ आमसञ्चार नीतिनिर्माणलाई प्राथमिकतामा राखेर काम भइरहेको बताउँदै मन्त्री राईले मुलुक निर्माणमा साँच्चिकै प्रभावकारी र सशक्त ढङ्गबाट भूमिका प्रस्तुत गर्न आमसञ्चार नीति निर्माण अघि बढाइएको बताए ।

न्यूनतम पारिश्रमिक निर्धारण, श्रमजीवी पत्रकार दुर्घटना बिमा जस्ता कार्यक्रम कार्यान्वयनका लागि निर्णय भइसकेको बताउँदै उनले नेपालको संविधानले सबैको अधिकारलाई समानुपातिक र समावेशी सिद्धान्तका आधारलाई सुनिश्चित गरेको विषय सञ्चारमाध्यमले आमजनता माझ पु¥याउन आवश्यक रहेकोमा जोड दिए । रासस