काठमाडौं–संविधानका केही प्रावधानप्रति असन्तुष्टि जनाउँदै आन्दोलनमा होमिएको संघीय गठबन्धनले मंगलबार प्रधानमन्त्रीको सरकारी निवास बालुवाटारमा धर्ना दिएको छ। विहान दश बजेदेखि सुरु गरिएको धर्नामा केहीबेर तनावसमेत भएको थियो। प्रदर्शनकारीले निषेधित क्षेत्र तोड्न खोजेपछि सुरक्षाकर्मीले हस्तक्षेप गरेको थियो।
प्रहरीको हस्तक्षेपबाट पाँच जना प्रदर्शनकारी घाइते भएको तमलोपा केन्द्रीय सदस्य सुरेश यादवले बताए। केही बेरको तनावपछि आन्दोलनकारी र सुरक्षाकर्मी दुवै सम्यमित भएका थिए। दिउँसोको मध्य घामसँगै प्रदर्शनकारीले बीच सडकमा बसेर नाचगान गर्न गालेका थिए। सुरुमा सरकार र प्रधानमन्त्री विरुद्ध चर्का नारा लगाएका प्रदर्शनकारी त्यसपछि भने नाचगानमा व्यस्त देखिन्थे।

गठबन्धनको काठमाडौं केन्द्रित पहिलो चरणको आन्दोलन बुधबार रत्नपार्कस्थित शान्ति बाटिकामा विरोधसभा गरेर समापन हुँदैछ । बिहीबार बस्ने गठबन्धनको बैठकले अर्को चरणको आन्दोलनको घोषणा गर्ने गठबन्धनका नेताहरुले जनाएका छन्। संविधानका केही प्रावधानप्रति असन्तुष्टि जनाउँदै मधेसी मोर्चाले ६ महिना लामो मधेस केन्द्रित आन्दोलनसहित नाकाबन्दीसमेत गरेको थियो। त्यहीबीचमा सरकारले मधेसी मोर्चाको माग सम्बोधन गर्न भन्दै संविधान संशोधन गरिसकेको छ भने मधेसी मोर्चाले मुख्य रुपमा उठाएको सीमाकंनको मुद्दा सम्बोधन गर्न मोर्चाकै सहमतिमा उच्चस्तरीय राजनीतिक समिति गठन गरिरसकेको छ। तर मोर्चाले समितिमा आफ्नातर्फबाट प्रतिनिधि नपठाएपछि समितिले पूर्णता पाउन सकेको छैन।