भारतको बिहारमा एक युवकले साहुसँग लिएको ऋण तिर्न नसक्दा साहुलाई नै आफ्नी श्रीमती तथा बच्चाबच्ची जिम्मा लगाई दिएका छन् ।बिहारको नालन्दा जिल्लाको नारजपुर गाउँका एक युवकले गाउँकै एक साहुसँग लिएको ऋण तिर्न नसकेपछि आफ्नी श्रीमती नै साहुसँग अन्माइदिएका छन् । उनले श्रीमतीसँगै बच्चा पनि साहुलाई उपहार दिएका छन् ।

समाचार अनुसार हिमांसु प्रसाद सुमन नामका ती युवकले फोटो स्टुडियो खोल्नका लागि गाउँकै साहु सावन कुमारसँग चार लाख भारु ऋण लिएका रहेछन् ।ऋण लिएपछि सुमनले एकजना केटीसँग प्रेम गरे र पछि बिहे पनि गरे । लभको चक्कर तथा बिहेपछि उनले जुन कामका लागि ऋण लिएको हो त्यो काम गर्नुभन्दा ऐश आराममा पैसा उडाए ।

जसका कारण उनले ऋणको ब्याज पनि तिर्न सकेनन् र ऋण बढ्दै गयो । जब साहु सावन कुमारले आफ्नो पैसा तिर्नका लागि हिमांसुलाई आग्रह गरे तब उनले अनौठो प्रस्ताव राखे ।

हिमांसुले आफुले पैसा तिर्न नसक्ने बरु पैसाको बदलामा श्रीमती र बच्चा दिने प्रस्ताव राखे । अनौठो त के भयो भने सावन कुमारले पनि ऋणीकी श्रीमती र बच्चा बेहोर्न मन्जुरी जनाए ।

दुबैको सहमतिमै हिमांसुले आफ्नी श्रीमतीको बिहे साहु सावन कुमारसँग गराइदिए र श्रीमतीसँगै बच्चालाई  पनि विदा गरे । यो घटनाले गाउँमा सनसनी मच्चाएको छ ।

यसरी सम्बन्ध विच्छेद नगरीकनै आफ्नी श्रीमती अर्कैलाई सुम्पिने हिमांसु कानूनको फन्दामा पर्नसक्ने बताइएको छ । तर यो बारेमा गाउँका कोहीपनि मानिस बोल्न नचाहने हुनाले पुलिसले पनि केही गर्न सकेको छैन । एजेन्सी