काठमाडौं । नेपाली राजनीतिको पर्दा अगाडि सरकार गिराउने र टिकाउने खेल हुँदैछ तर पर्दा पछाडि अर्कै भयानक खेल भइरहेको छ । झलक्क हेर्दा असम्भव झैं लाग्ने एउटा डरलाग्दो खेलले नेपाली राजनीतिमा टाउको उठाउन थालेको छ । सो खेल अनुसार नेपालमा राजतन्त्र पुनरस्थापित गर्ने होइन, सम्राटतन्त्र स्थापित गरिनेछ । हिजो राजा थिए, अब सम्राट हुनेछन् । सम्राटका रुपमा ज्ञानेन्द्र शाह र हृदयेन्द्र मध्ये को हुन्छन् थाहा छैन तर यही वंशबाट नेपालमा ‘सम्राट’ स्थापित गर्ने ग्राण्ड डिजाइन बनिरहेको छ । यही डिजाइन अनुसार २०७३ बैशाख १६ गते पूर्वराजा ज्ञानेन्द्र अचानक भारत गए । दुई रात दिल्ली बसे । अनि ठूलो उत्साह र सपना बोकेर नेपाल फर्किए ।

पूर्व राजा ज्ञानेन्द्र दिल्ली गएको हाराहारीमै नेपालबाट पूर्व प्रधानमन्त्री शेरबहादुर देउवा र एमाओवादीका शक्तिशाली नेता कृष्णबहादुर महरा पनि भारत गएका थिए । नेपालको जल्दाबल्दा र निर्णायक पार्टीका यी नेताहरूलाई भारतीय प्रधानमन्त्री नरेन्द्र मोदीले भेटेनन् तर पूर्वराजा ज्ञानेन्द्रसंग भने गुप्त रुपमा भेटे । ज्ञानेन्द्र शाह निकटहरू बताउँछन्– पूर्वराजा अहिले अत्यन्तै उत्साही भएका छन्, राजाका रुपमा विदा भएका थिए, अब सम्राटका रुपमा फर्किने बातावरण बन्दैछ । स्रोतहरू भन्छन्– भारतको यसपटकको भ्रमणपछि चाहिं ज्ञानेन्द्र शाह अन्त्यन्तै आशावादी भएका छन् ।

सत्ता र सम्राटको खेल

यता काठमाडौंका कोठाचोटामा सत्ता परिवर्तनको खेल चलिरहँदा उता भारतमा चाहिं नेपालमा हिन्दू राष्ट्र र सम्राटको आगमनको खेल चलिरहेको थियो । ओली सरकार हटाउन भारतले चाल चलेको एमाले नेतृत्वले टिप्पणी गरिरहँदा सत्ताको खेलमा भारत पराजित भयो भनिंदैछ । तर, भारतका लागि, खासगरी नरेन्द्र मोदी नेतृत्वको भारत सरकारका लागि सत्ताको खेल प्राथमिकताको मुख्य विषय रहेन । विश्वस्त स्रोतका अनुसार, उसले राजतन्त्र होइन सम्राटतन्त्र स्थापित गर्ने, सम्राटतन्त्रको साथमा हिन्दू राज्य बनाउने ब्यूह रचना गर्दैछ । हिन्दू सम्राट स्थापित गरिएको प्रचार भारतमा समेत गरेर भारतमा हिन्दूत्वलाई मनोवैज्ञानिक रुपमा समेत बलियो बनाउने प्रयास मोदीले गरिरहेका छन् । पूर्व महाराजा ज्ञानेन्द्र शाह निकट एक स्रोतले भन्यो– राजनीतिक रुपमा भुटानी अनुहारको नेपालको सम्राट बनाउने तर मनोवैज्ञानिक, सांस्कृतिक, सामाजिक र धार्मिक रुपमा भारतको समेत हिन्दू सम्राटका रुपमा शाहवंश उदाउन लागेको छ । उनको यो भनाई निकै अर्थपूर्ण र दूरगामी प्रकृतिको छ ।

सत्ताको खेलमा भने केपी ओलीले जितेका छन् । भीरको छेउमा पुगेर गुल्टिनबाट ओली सरकार जोगिएको छ । सरकार जोगिए लगत्तै नेपाल भारत सम्बन्ध झनै चिसिएको छ । राष्ट्रपति विद्यादेवी भण्डारीको पहिलो भारत भ्रमण रद्द भएको छ । भारत भ्रमण रद्द हुनुमा हिन्दूत्व पनि एक कारक रहेको बताईंदैछ । राष्ट्रपति जाने उज्जैनको कुम्भमेलामा अर्कै राजनीतिक तयारी भइरहेको सरकारले खबर पायो । कुम्भमेलामा राष्ट्रपति जाने तर त्यहाँ राजतन्त्र पुनरस्थापना र हिन्दू राष्ट्र नेपाल निर्माणको नारा र कार्यक्रम हुनेवाला थियो । नेपालमा हिन्दू राष्ट्र पुनस्र्थापनाका लागि उज्जैनबाट विशेष अभियान चलाइने भएको छ । यसका लागि उज्जैनमा ब्यापक तयारी भइरहेको भारतीय सञ्चारमाध्यमहरूले पनि समाचार दिएका छन् ।

स्रोतका अनुसार, उज्जैनमा २०७३ जेठ ५ गते हिन्दू महासम्मेलन हुन लागेको छ । पाइलट बाबाको क्याम्प नजिकै महासम्मेलनका लागि पण्डाल तयार भइरहेको छ । उक्त कार्यक्रममा सहभागिताका लागि पूर्व राजा ज्ञानेन्द्र शाह र अयोध्या राम मन्दिर आन्दोलनका प्रमुख महन्त नृत्य गोपालदासलाई निम्ता पठाइएको पनि थाहा भएको छ ।

एजेन्सीहरूको पनि चलखेल

नेपालमा राजतन्त्र पुर्नस्थापनाका लागि भारतीय एजेन्सीहरू पनि सक्रिय हुन थालेको बुझिन्छ । विगतमा भारतीय जनता पार्टीको मात्र एजेण्डा ठानिएको हिन्दू राष्ट्रको मुद्दालाई भारत सरकारको आधिकारिक संस्थाले पनि भित्रभित्रै बोक्नु र अगाडि बढाउनु अर्थपूर्ण मानिएको छ । स्रोतको दावी छ– दुई रात भारत भ्रमणको क्रममा पूर्वराजा ज्ञानेन्द्र शाहले ‘रअ’का पूर्व प्रमुखहरूसंग पनि भेट गरेका छन् । भ्रमणमा ज्ञानेन्द्र शाहले एकजना अंगरक्षक पनि लगेका थिए । स्रोत भन्छ– ज्ञानेन्द्र शाहलाई मोदीले नै निम्ता गरेका थिए । नयाँ दिल्लीमा पूर्व महाराजा ज्ञानेन्द्र शाह ताज होटलमा र सागर तिमिल्सिना अशोका होटलमा बसेका थिए । उनीहरू दुईजना बेग्लाबेग्लै होटलमा बस्नुलाई पनि अनौठो मानिएको छ । निजी सचिवलाई पनि सबै भेटघाटको जानकारी नहुने व्यवस्था ज्ञानेन्द्र शाहले मिलाएका थिए । दिल्ली भ्रमणबाट ज्ञानेन्द्र कति खुसी भए भने फर्किए लगत्तै त्रिशुली नदीमा र्‍याफ्टिङ गर्न परिवार लिएर गएका थिए । साथमा थिए तिमिल्सिनिा पनि ।

संविधान भत्काएर सम्राट

यो संविधान अनुसार, हिन्दू राज्य बनाउन सकिए पनि सम्राट स्थापित गर्न सकिन्न । सम्राट बनाउने हो भने संविधान भत्काउनुपर्ने हुन्छ । यो संविधान कार्यान्वयन नै गर्न नदिने पक्षमा भारत रहेको स्रोतहरूको दावी छ । संविधान कार्यान्वयनका लागि प्रादेशिक संरचना निर्माण अपरिहार्य छ । त्यसबाहेक अन्य किसिमका संघीय संरचनाहरू निर्माण गर्नैपर्ने हुन्छ । यी सब कामको कुनै तयारी छैन । प्रधानमन्त्री र मन्त्रीहरूले आउँदो मंसीरमा स्थानीय चुनाव गर्ने भनेका छन् तर यो काम सजिलो छैन । अब भारत चुनाव गर्न दिने पक्षमा हुने छैन । यहाँको विभिन्न पक्षलाई उचालेर चुनाव विथोल्न भारतले कुनै कसर बाँकी राख्ने छैन ।

राष्ट्रपतिको भारत भ्रमण रद्द र भारतका लागि नेपाली राजदूतको फिर्ता प्रकरणले फेरि क्रुद्ध भएको भारतले राजनीतिक कोर्ष नै भत्काउन चाहेको देखिन्छ । यो राजनीतिक कोर्ष भत्काएर के गर्ने त ? भारतीय समाधान हो सम्राटतन्त्रको स्थापना र राजतन्त्रको पुनरस्थापना गर्ने । भारतले चाहे जस्तो यो काम सजिलो भने छैन । यस्तो भित्री प्रपंचले नेपाललाई थप अस्थिर बनाउने चिन्ता बौद्धिक जगतमा बढेको छ । नेपालले फेरि महासंकटको सामना गर्नुपर्ने संकेतहरू दक्षिणतिरबाट आइरहेका छन् ।@विक्लीनेपाल |