भारत र एसियाको सबैभन्दा ठूलो रेडलाइट एरियामा यौनकर्मीको जीवनशैली कस्तो छ ? उनीहरू कामपछि आफ्ना बालबच्चासँग कसरी समय व्यतित गर्छन् ? कसरी मेकअप गरेर ग्राहकको पर्खाइमा बस्छन् ? यावत् जिज्ञासा मेट्ने गरी विभिन्न तस्बिर सार्वजनिक भएका छन् ।

पश्चिमी कोलकाताको सोनागाछीलाई एसियाकै ठूलो रेडलाइट एरिया मानिन्छ । एक अनुमान अनुसार त्यहाँ करिब १४ हजार महिला यौन व्यवसायमा संलग्न छन् । त्यसमध्ये ठूलो संख्या नाबालिगहरूको छ । हरेक वर्ष त्यहाँ १ हजार महिला थपिने तथ्यांक छ, जसमा केही नेपाली पनि हुन्छन् ।

कसरी आइपुग्छन् ?

केही महिला ट्राफिकिङको सिकार भएर सोनगाछीको यौनकर्ममा होमिन आइपुग्छन् । कोही चाहिँ आफ्नै मर्जीले स्वतस्फुर्त रूपमा आउँछन् । एक वेबसाइटसँग कुराकानी गर्दै एक यौनकर्मीले भनेकी छिन्– उनी पहिले घरेलु कामदारका रूपमा गुजारा चलाउँथिन् । त्यतिबेला मासिक करिब डेढ हजार रुपैयाँ उनको पारिश्रमिक थियो । यद्यपि अहिले उनी मासिक भारु १६ हजार रुपैयाँ आर्जन गर्छिन् ।

३० वर्षीया अर्की महिला भन्छिन्– ‘म दाम्पत्य जीवनमा बाँधिएकी थिएँ, सात वर्षसम्म । मेरो लोग्ने जड्याहा थियो । उसले मलाई हरेक दिन कुटपिट गथ्र्यो । जीवन नारकीय भएपछि छोरीको भविष्य सम्झेर म त्यहाँबाट अलग भएर यहाँ आएँ ।’ श्रीमान् छाडेर राजीखुसीले यहाँ आएपछि उनका दिनहरू खुसीपूर्वक बितिरहेका छन् । ती महिलाका अनुसार एक ग्राहकसँग उनको प्रेम सम्बन्धसमेत स्थापित भएको छ ।

कतिपय महिला आफ्ना सन्ततीको भविष्य उज्वल बनाउन बाध्यतावश वेश्यावृत्तिमा सामेल हुनु परेको बताउँछन् । दास नामले चिनिने एक महिला भन्छिन्– ‘मेरा दुवै सन्तान पढिरहेका छन् । के घरमै बसेर मैले उनीहरूको स्कुल फी तिर्न सक्छु ? समाजले हाम्रो निन्दा गर्नुअघि स्वयम् आफ्ना बारेमा सोच्नुपर्छ । के हाम्रा लागि उनीहरूले योभन्दा राम्रो अर्को कुनै रोजगारी तयार गरेका छन् ?’ – एजेन्सी |