पाल्पा, वैशाख २६ गते । जिल्लाका किसानले व्यावसायिक च्याउखेतीबाट मनग्य आम्दानी गर्न थालेका छन् ।च्याउ खाँदा स्वास्थ्यलाई फाइदा पुग्ने भएपछि यसको माग बढ्न थालेको छ । यसबाट च्याउखेती गर्ने किसानले मनग्य आम्दानी गर्न सफल भएका छन् । यसअघि च्याउ उत्पादन भए पनि बजारको अभाव हुने गरेको थियो । अहिले दैनिक १५ टनसम्म च्याउ बिक्री हुने गरेको मदनपोखरा–१ जरेपिपलका केशव कार्की बताउनुहुन्छ । माग बढेपछि यसको खेती गर्ने किसान पनि बढेका छन् ।

च्याउको खपत बढेपछि उत्पादन बढाउन किसानमा उत्साह थपिएको कार्कीको भनाइ छ । खपत बढ्नाले अहिले युवा पुस्तासमेत च्याउ खेतीप्रति आकर्षित बनेको छ । यहाँ उत्पादन भएको च्याउ सदरमुकाम तानसेन, बुटवल, रिडी, प्रभास, गुल्मी र स्याङ्जा जिल्लामा समेत निर्यात हँुदै आएको छ ।

मदनपोखराको डुम्रे, तेल्घा, रामपुर, नायर, सोमादी, बराङ्दी, ताहुँ, कसेनी, रुप्से, झुम्सा लगायतका स्थानबाट दैनिक सात टन च्याउ उत्पादन हुने जिल्ला च्याउ उत्पादक सङ्घले जनाएको छ । सिताके, कन्ये, गोब्रे, पराले र डल्ले च्याउको व्यावसायिक खेती जिल्लामा राम्रो रहेको किसानको भनाइ छ । च्याउखेतीबाट अहिले किसानले वार्षिक रु ५० हजार बढी आम्दानी गर्न थालेका छन् ।

जिल्लाको अधिकांश स्थान चिस्यानयुक्त भएकाले च्याउ उत्पादनका लागि यहाँको भूगोल सुहाउँदो भएको जिल्ला कृषि विकास कार्यालयले जनाएको छ । रासस