काठमाडौँ, वैशाख २५ गते । नेपालका सबै धर्म, जाति तथा संस्कृतिलाई सम्मान गर्ने संस्कारको विकास नभएसम्म देशको विकास असम्भव रहेको आज यहाँ आयोजित कार्यक्रमका वक्ताले धारणा राख्नु भएको छ ।

नेपाल लोकतान्त्रिक किरात राई सङ्घको दोस्रो राष्ट्रिय सम्मेलनमा उहाँहरुले कुनै पनि जातजाति वा संस्कृतिलाई दबाउने वा थिचोमिचो गर्ने प्रवृित्त त्याग्नुपर्नेमा जोड दिनुभयो ।

कार्यक्रमको उद्घाटन गर्दै नेकपा(एमाले)का केन्द्रीय सचिव गोकर्ण विष्टले एउटै भाषा, एउटै संस्कृति र एउटै धर्मबाट देशको कहिल्यै विकास नहुने धारणा राख्नु भयो ।

उहाँले किराँत राईहरुको संस्कृति निक्कै पुरानो र देशको गौरव नै हो भन्दै नयाँ संविधानमार्फत सबै भाषाभाषी र संस्कृतिको विकास गर्ने अवसरलाई स्थापित गरेको बताउनुभयो ।

एमालेका केन्द्रीय सदस्य तथा नेपाल लोकतान्त्रिक आदिवासी जनजाति महासङ्घका उपाध्यक्ष जयन्ती राईले नेपालमा जातीय, क्षेत्रीयलगायत विविध क्षेत्रमा महिला, दलित, आदिवासी जनजाति तथा पिछडिएका व्यक्तिमा विभेद् रहेको बताउँदै आदिवासी जनजातिको समस्या स्थायी रुपमा समाधान नभएसम्म देशको विकासको कल्पना पनि गर्न नसकिने बताउनुभयो ।

नेपाल लोकतान्त्रिक आदिवासी जनजाति महासङ्घका महासचिव चरण राईले देशका सम्पूर्ण जनताको ३८ प्रतिशतको प्रतिनिधित्व गर्ने आदिवासी जनजातिको सवाल गम्भीर वहसको विषय रहेको बताउँदै उनीहरुको जातीय पहिचान तथा हकअधिकार सुनिश्चित गर्न धर्म, संस्कारलाई जगेर्ना गर्दै राष्ट्र अघि बढ्नुपर्ने बताउनुभयो । रासस