स्मार्टफोन प्रयोग गर्नुहुन्छ भने त्यसको सुरक्षा र सफाइमा पनि ध्यान दिनु आवश्यक छ । स्मार्टफोन जति नै स्मार्ट भए पनि यदी त्यसको स्क्रिनमा फोहर वा धब्बा लागेको छ भने त्यसले सही ढंगमा काम गर्न सक्दैन । त्यसैले स्मार्टफोनको स्क्रिनलाई सफा र दुरुस्त राख्नुपर्छ । समय समयमा यसको स्क्रिनमा लागेको दाग धब्बा साथै औंलाका डामहरूलाई हटाउनु पर्छ । त्यसका लागि निम्न विधि अपनाउन सकिन्छ ।

– स्मार्टफोन स्क्रिनमा छोए चल्छ त्यसको अर्थ स्क्रिनमा छुनासाथ त्यहाँ देखिएको एप्लिकेसन् खुल्छ । यसले के जनाउँछ भने स्क्रिनमा विशेष खालको उपकरण जोडिएको छ जसले छुनासाथ काम गर्छ । त्यसो भएकाले मोबाइल सफा गर्दा त्यसको स्क्रिनमा दबाब पर्ने गरी हात चलाउनु हुँदैन । कुनै धब्बा वा दाग सहजै नगएको खण्डमा त्यसलाई सफा गर्नका लागि कपडा रगड्नु भन्दा पनि बजारमा पाइने स्प्रिट जस्ता रसायनिक झोलहरू प्रयोग गर्नुपर्छ । जसले सहजै धब्बा र टाँसिएर रहेका फोहरहरू हटाउन सकिन्छ ।

– स्मार्टफोन बोक्नेहरूले आफ्नो साथमा सदैव माइक्रोफाइबरको कपडा राख्नुपर्छ । जसले मोबाइलको स्क्रिन सफा गर्दा स्क्रिनमा धब्बा वा कोरिने समस्या हुँदैन । किनभने यो कपडा निक्कै नै मुलायम हुन्छ । मोबाइल किनिसकेपछि त्यसको स्क्रिनमा स्क्रिन गार्ड टाँस्दा खेरी नै पसलेसँग यसखालको कपडा माग्न सक्नुहुन्छ । यो खालको कपडा चस्मा सफा गर्नका लागि पनि प्रयोग हुन्छ किनभने यसमा सामान्य कपडामा भन्दा मुलायम रेशा हुन्छन् ।

 -स्क्रिनको सफाइ गर्दा तपार्ईंंको हातको चाल गोलाकार हुनुपर्छ । स्क्रिनलाई तलबाट माथि वा माथिबाट तल गरेर सफा गर्दा स्क्रिन सफा गर्न प्रयोग गरिएको तरल पदार्थ भित्र छिर्न सक्छ, त्यसैले कपडा हलुकासँग स्क्रिनमा गोलाकार चालमा सफा गर्नुपर्छ ।