नवलपरासी ।वैशाख १६ – सरकारले फ्रि भिसा फ्रि टिकट कार्यान्वयन गरेपछि नवलपरासी गैंडाकोट ७ गैरीका लक्ष्मीनारायण सापकोटा थोरै पैसामा विदेश जान पाईने भो भनेर फुरुङ्ग हुनुभयो । परिवारको आर्थिक अवस्था कमजोर थियो । त्यसैले एकपटक विदेश नगई हुँदैन भन्ने लागेपछि विदेश जाने निर्णयमा पुगेका लक्ष्मीनारायणको भेट बुटवलका प्रकाश गौतमसँग भएपछि कतार जाने पक्का भयो । अनि प्रक्रिया सुरु भयो काठमाडौंको मदरल्याण्ड म्यानपावरबाट ।

म्यानपावरमा कुरा हुँदा फ्रि भिसा फ्रि टिकटकै कुरा भएको थियो । तर भिसा आएपछि एजेन्टले भने ९० हजार मागे । ‘तर मैले ९० हजार त सरकारले तोके भन्दा धेरै भयो भन्दै तिर्न मानिन’ लक्ष्मीनारायणले भन्नुभयो । तर त्यतिबेला व्यवसायीले थोरै पैसामा काम नराम्रो हुने तर धेरै पैसा तिरेर गए राम्रो काम भनेर लोभ देखाए । तर भिषामा लेवरको काम भनेपछि उहाँ दोधारमा पर्नुभयो । तर म्यानपावरले तीन महिना काम सिकाउँछ अनि त्यसपछि पैसा त कमाई झनै राम्रो हुन्छ भन्दै आफनै कुरामा लोभ्याए ।

यति भन्दा पनि विदेश नजाने अडानबाट पछि हट्नुभएको थिएन । त्यसैले विदेश जानुको सट्टा पासपोर्ट नै फिर्ता मागिरहनुभएको थियो म्यानपावरसँग । तर एजेन्टले भिषा क्यान्सिल गरे वापत रकम लाग्ने बताए । त्यसपछि त विदेश गएपनि, नगएपनि पैसा खर्च हुने नै भएपछि उहाँले ९० हजार नै तिरेर जाने निधो गर्नुभयो । म्यानपावरले धेरै पटक एउटै कुरा दोहो¥याएपछि लक्ष्मीनारायणलाई पनि धेरै पैसा तिरे राम्रै काम पाईन्छ कि भन्ने लागेर पैसा बुझाउनुभयो अनि कात्तिक १८ गते कतारका लागि उड्नुभयो ।

नेपालबाट उहाँलाई वायरिङका लागि भनेर पठाइएको थियो । एक महिनासम्म त भनेकै काम पाउनुभयो उहाँले । तर त्यसपछि भने उहाँलाई ग्यास प्लान्टमा काम पठाइयो । एक त फ्रि भिसा फ्रि टिकट लागु भएपछि पनि ९० हजार तिरेर कतार जानुप¥यो अनि एक महिनामै भनिएको भन्दा निक्कै खतरा मोलेर गर्नुपर्ने काम । भन्न्हुन्छ ‘त्यहाँ गएपछि भनेको काम पनि पाइएन तलब झन थौरै थियो । खान बस्न त थियो, तर राम्रो थिएन ।’
ग्यास प्लान्टमा काम गर्दा उहाँ २० फिट जमिन मुनीसम्म अक्सिजन लिएर जानुभयो । ‘यदि काम गर्दा एक छिन ढिलो भयो भने अक्सिजन सकिन पनि सक्थ्यो , यदि त्यसो भइदिएको भए त ……….’ यसअघि केहि कामदारले त्यसरी नै ज्यान गुमाएको खवर सुनाउँदै लक्ष्मीनारायणले आफनो कामको जोखिम सुनाउनुभयो । त्यसपछि भने उहाँले विदेश बसेर काम गर्ने भन्दा पनि घर फर्किने सोच बनाएर घरमा दाईलाई फोन गर्नुभयो । भाइको अवस्था बुझेपछि दाजु परमानन्द सापकोटा सहयोग माग्दै कावासोतीमा रहेको सुरक्षित आप्रवासन सूचना तथा परामर्श केन्द्रमा पुग्नुभयो ।

केन्द्रले सहयोग गरेपछि लक्ष्मीनारायण गएको फागुनमा नेपाल फर्किनुभएको छ । नेपाल आएपछि भनेको काम नपाएर फर्किनुपरेको भन्दै उहाँले क्षतिपूर्तिका लागि निवेदन पनि हाल्नुभयो । अनि त्यही निवेदनका आधारमा ५५ हजार क्षतिपूर्ति पनि पाउनुभयो ।

विदेशमा हण्डर खाएर फर्किएपछि लक्ष्मीनारायणले पुरानै काम थाल्नुभएको छ । उहाँ विदेश जानु अघि वायरिङकै काम गर्नुहुन्थ्यो । त्यहि भएर विदेश पनि त्यही कामका लागि जानुभयो तर विदेश सोच जस्तो भएन । भन्नुहुन्छ ‘सीप थियो तर फापेन त्यही भएर अहिले नेपालमै आफनो सीप प्रयोग गर्दैछु ।’ अहिले उहाँ गाउँकै घरहरुमा वायरिङको काम गर्नुहुन्छ अनि महिनाको १५ देखि २० हजार कमाउनुहुन्छ ।

नेपालमा गर्दै गरेको काम छोडेर विदेश गएका लक्ष्मीनारायणले आफूले मात्रै पाठ सिक्नुभएन, एजेण्टका चिल्ला कुरा पत्याएर विदेश जान ठिक्क परेकाहरुलाई पनि पाठ सिकाउनुभएको छ । उहाँ भन्नुहुन्छ ‘फ्रि भिसा फ्रि टिकट लागु भएपनि म्यानपावरले धेरै पैसा नतिरे राम्रो काम पाइँदैन भनेर ठगिरहेका रहेछन त्यसैले सचेत हुनुहोला ।@प्रेम क्षेत्री/उजायालो |