बुद्ध ज्यन्तीको तयारी बारे जानकारीदिदै लुम्विनी विकास कोषका पदाधिकारी एवं सुरक्षाकर्मी

अर्जुन तामाङ

भैरहवा : लुम्विनीवासी संयुक्त राष्ट्र संघका महासचिव मुन र भारतीय प्रधानमन्त्रीको प्रतिक्षामा रहेका छन् । लुम्बिनी विकास कोषले आसन्न २५६० औँ अन्तराष्ट्रिय बुद्ध जयन्तीको अवसरमा संयुक्त राष्ट्रसंघका महासचिव वान कि मुन, भारतीय प्रधानमन्त्री नरेन्द्र मोदी, चिनियाँ राष्ट्रपति लगायत युरोपीयन युनिन र एशिया महादेशमा रहेका २२ देशका विशिष्ट, कुटनीतिक व्यक्तित्व एवं संस्कृति मन्त्रीहरुलाई निमन्त्रणा पत्र पठाईसकेको उनीहरुको स्वागतको प्रतिक्षामा रहेको कोषका सदस्य सचिव अजितमान तामाङले जानकारीदिए । ‘पत्रहरु पठाएका छौं । तर उताबाट त्यसको जवाफ आइसकेको छैन् ।’ सचिव तामाङले भने । को–को आउछन भन्ने निश्चित केहि दिनमा हुने उनले जानकारीदिए ।

बौद्ध सम्मेलन यहि जेठ ६, ७ र ८ गते तीनदिनसम्म हुनेछ । पहिलो र दास्रो दिन काठमाण्डौंमा र तेस्रो दिन लुम्बिनीमा विविध कार्यक्रमको आयोजना गरी मनाइदै छ । कोषले बुद्ध जयन्तीमा लुम्बिनी आउने पाहुनाहरुलाई लुम्बिनीका साथै बुद्धसँग सम्बन्धित तिलौराकोट, देवदह र रामग्राम पनि अवलोकन गराउने र जसका लागि एककरोड रकम विनियोजन गरेको छ । काठमाण्डौं संचालन गरिने दुईदिने कार्यक्रमको खर्च सवै नेपाल सरकारले व्यहोर्ने सहमती भएको सचिवले पत्रकार सम्मेलनमा वताए ।

जेठ ८ गते लुम्विनीमा बुद्ध जयन्तीमा सहभागी हुने विशिष्ट व्यक्तित्व एवं पाहुनाहरुलाई जेठ ९ गते बुद्धको क्रिडास्थल दरवार त्यागेको ठाऊ कपिलवस्तुको तिलौराकोट, गेरु वस्त्र धारण गरेको स्थल निग्रोधाराम कुदान, जेठ १० र ११ गते बुद्धको मामा घर रुपन्देही देवदह र नवलपरासी रामग्रामको स्थलगत अवलोकन गराइने योजना छ ।

विगतभन्दा कोष एवं नेपाल सरकारले विशेष रुपमा बुद्ध जयन्ती मनाउन गइरहेकोले अघिला वर्षहरुको भन्दा धेरै बढी रकम विनियोजन भएको उनले बताए । गतवर्षहरुमा कोषले बुद्धजयन्तीका अवसरमा २५देखि ३० लाख रुपैयाँ खर्च गर्ने गर्दथ्यो ।

बुद्ध जयन्ती भव्य र सभ्य रुपमा संचालन गर्नका लागि विभिन्न समितिहरु समेत गठन गरिसकेको र सबै समितिले जिम्मेवारीपूर्ण ढंगले काम गरिरहेको कोषका उपाध्यक्ष सिद्धार्थ महर्जनले बताए । लुम्बिनी क्षेत्रमा सरसफाइ, रंगरोगन लगायतका कामहरु तिव्रगतिमा भइरहेका छन् ।