काठमाडौं, वैशाख १२ – वैदेशिक रोजगारलाई व्यवस्थित गर्नुपर्ने माग गर्दै आन्दोलनमा उत्रिएका म्यानपावर व्यवसायीले चर्को शुल्क असुल्दै कामदार पठाउने होडमा लागेका छन् । फ्रि भिसा फ्रि टिकटमा कामदार पठाउन नसक्ने अडान लिएर सरकारसँग वार्ता गरे पनि सरकारले तत्काल निर्णय नफेर्ने संकेत पाए पछि व्यवसायी कमाउ धन्दामा लागेका हुन् ।

नेपाल वैदेशिक रोजगार व्यवसायी संघले पूर्व श्रम स्वीकृति नलिने बताए पनि व्यवसायीले दैनिक १५ सय श्रम स्वीकृति लिइरहेका वैदेशिक रोजगार विभागले जनाएको छ । विभागका अनुसार आन्दोलन अलपत्र परेपछि संस्थागत श्रम स्वीकृति लिनेको संख्या बढेको छ । संघको आन्दोलन अघिपनि दैनिक १५ सय श्रम स्वीकृति दिने गरिएको थियो ।

सरकार आन्तरिक तयारीमा लागेका बेला व्यवसायी भने फ्रि भिसा फ्रि टिकटको निर्णय उल्लंघन गर्दै कामदार पठाइरहेका छन् । विभागले फ्रि भिसा फ्रि टिकट कार्यन्वयन भए नभएको अनुगमन गर्न सकेको छैन् ।

श्रम तथा रोजगार मन्त्रालय आन्तरिक तयारीमा रहेको भन्दै कामदार ठगिएको बेखबर जस्तै भएर बनेको छ । ठगीका उजुरीमा कारवाही गर्ने प्रहरीले समेत दवाव झेल्नु परेको छ । म्यानपावर व्यवसायी भने वैदेशिक रोजगार व्यवस्थित हुने डरले कमाउ धन्दामा लागेका छन् ।

यस्तै निर्णय उल्ट्याउन राजनीतिक शक्ति भिडाउने खेलमा म्यानपावर व्यवसायी व्यस्त छन् । केहि दिन देखि उनीहरुले विभिन्न दलका संसद तथा राजनीतिक दलका नेतालाई भेट्ने क्रम तिव्र बनाएका छन् । संघका अध्यक्ष विमल ढकालले सरकारले आन्तरिक तयारी गरिरहेको बताएकाले सरकारको निर्णय पर्खिएको बताउनुभयो ।

पूर्व श्रम स्वीकृति लिने संघको निर्णय नभएको र व्यवसायीले आफुखुसी गरेको उहाँको भनाई छ । अध्यक्ष ढकालले सरकारले निर्णय पुनर्विचार नगरेसम्म न्युनतम लागतमै पठाउनु पर्ने धारण राखे पनि म्यानपावरले मनपरी शुल्क लिइरहेका छन् ।

न्युनतम लागतको कुरा गर्ने कामदारलाई रोक्दै बढि पैसा दिने कामदार पठाइरहेको पाइएको छ । यो बिचमा जतिसक्दो छिटो र धेरै कामदार बढि पैसामा पठाउने खेलमा म्यानपावर लागेका छन् । सरकारले भने निर्णय पुनर्विचार नहुने बताइसकेको छ । श्रम तथा रोजगार मन्त्रालयका प्रवक्ता गोविन्दमणि भुर्तेलले सरकारले फ्रि भिसा फ्रि टिकटको निर्णय पुनर्विचार नगर्ने बताएको समाचार उज्यालो अनलाइनमा छ  |