भैरहवा, वैशाख ११ गते । ज्यालादारी कर्मचारीलाई करारमा नियुक्ती गर्नुपर्ने र कारार कर्मचारीहरुलाई स्थायी प्रकृयामा लैजानु पर्ने आफ्ना मागहरु पुरा नभएको भन्दै लुम्बिनी विकास कोषका कर्मचारीहरुले कोषको कार्यालयमा तालाबन्दी गरेका छन् ।

कर्मचारीको तालाबन्दी र धर्नाका कारण बुद्ध जन्मस्थलको संरक्षण र संवद्र्धनको जिम्मा पाएको लुम्बिनी विकास कोषको सम्पूर्ण काम ठप्प भएको छ । यसअघि पनि महिनौ आन्दोलनमा उत्रेर कर्मचारीहरुले काम ठप्प पारेपछि गएको माघ महिनामा व्यवस्थापिका संसदले कर्मचारीहरुको मागलाई कानुनी प्रकृया पुरा गरेर करारलाई स्थायी र ज्यालादारीमा बढुवा गर्न र अन्य थप करार र ज्यालादारी कर्मचारी नियुक्त नगर्न निर्देशन दिएको थियो ।

मन्त्रालय र संसदको निर्णय विपरीत लुम्बिनी विकास कोषका पदाधिकारीहरुले आफ्ना मान्छेहरु नियुक्ती गरेको तर पूराना कर्मचारीहरुको मागलाई सम्बोधन नगरेकाले पुनः आन्दोलनमा उत्रिएको संघर्षरत कर्मचारीहरुले बताएका छन् ।

यसैबीच, लुम्बिनी साँस्कृतिक नगरपालिकाका कर्मचारीहरुलाई रुपन्देहीका स्थानीय विकास अधिकारी युवराज सुवेदीले सेवाग्राहीहरुलाई पारदर्शी ढंगबाट कामकाज गर्न निर्देशन दिनुभएको छ । उहाँले सेवाग्राहीहरुले दिएको उजुरीको आधारमा कर्मचारीहरु चारकिल्ला प्रमाणित गर्दा नगदी रसीद नकाटिएको छडके जाँचपडतालको भेटिएको भन्दै सो निर्देशन दिनुभएको हो ।

स्थानीय विकास अधिकारी सुवेदीले लुम्बिनी सांस्कृतिक नगरपालिकाका निमित्त कार्यालय प्रमुख बनारसी प्रसाद हरिजन लगायत सम्पूर्ण कर्मचारीहरुलाई जनताले तिरेको तिरोबाट तलबभत्ता खाएका कर्मचारीहरुले आफ्नो काम कर्तब्यको पालना बिहान १० बजेदेखि साँझ ५ बजे सम्म काम गर्नुका साथै बिलभौचर चुस्तदुरुस्त समेत राख्न निर्देशन दिएको बताउनुभयो । यद्यपि कर्मचारीहरुले सर्वसाधारण सेवाग्राहीसँग लिएको चारकिल्ला प्रमाणित रकमको रसीद नकाटी खल्तीमा राख्ने गरेको गुनासोको आधारमा जिबिसको छडकेपछि केही सुधार आउने अपेक्षा गरिएको छ ।