विराटनगर, वैशाख ७ – उप प्रधानमन्त्री विजयकुमार गच्छदारले संविधानको संशोधनले मात्र मधेसको समस्या समाधान हुने बताउनु भएको छ । सुनसरीमा मंगलबार भएको एक कार्यक्रममा बोल्दै उहाँले नागरिकलाई दुःख दिएर समस्या समाधान नहुने धारणा राख्नुभयो ।

जनता मारेर समस्याको समाधान नहुने भन्दै उहाँले संविधानको संशोधनले मात्र मधेसको समस्या समाधान हुने बताउनु भयो । त्यसका लागि सत्तापक्ष र प्रतिपक्ष गम्भीर भएर लागेकाले मधेसमा आन्दोलनरत दलहरु पनि गम्भीर भएर छलफलमा आउन आग्रह गर्नु भएको छ ।

‘जनता मार्ने आन्दोलन बन्द गराैँ, गच्छदारले भन्नुभयो, ‘जनता मार्ने आन्दोलन गरेर समस्याको समाधान हुँदैन, संविधान संशोधनले नै समस्याको समाधान गर्छ ।’ उहाँले आफू विकासको नाममा राजनीती नगर्ने प्रतिबद्धता जनाउँदै जनताको आवश्यकताको आधारमा विकासको कामले तीब्रता पाउनुपर्ने बताउनुभयो ।
अहिले पनि धेरै खोलाका पुलहरु आफू मन्त्री भएको बेलामा बनेको दाबी गर्दे विकास चाहनेहरुले आफूलाई विकासे मन्त्रीको रुपमा समेत लिने गरेको खुलासा गर्नुभयो । ६ महिने नाकाबन्दी तथा मधेस आन्दोलनले नेपालीलाई विकास निर्माणको कामदेखि आर्थिक विकासको काममा ६ वर्ष पछि धकेलेकोले अब विकासको काममा लाग्ने बेला आएको बताउनुभयो ।