काठमाडौँ : मन्त्रिपरिषद्को आजको बैठकले २१ देशका लागि राजदूत सिफारिश गरेको छ। सत्ता गठबन्धनको नेतृत्व गर्ने एमालेबाट पाँच, एमाओवादीबाट चार र राप्रपा नेपालबाट एक गरी राजदूतमा भागवण्डा गरिएको छ भने दूतावासै नभएको देशमा समेत राजदूत सिफारिश गरिएको छ।

एमालेबाट सिफारिश भएकामध्ये चीनका लागि राजदूतमा पूर्व परराष्ट्र मन्त्री महेन्द्रबहादुर पान्डेको नाम पनि रहेको छ। पान्डे बाहेक एमालेको कोटामा नारद भारद्वाज श्रीलंका, शिवमाया तुम्बाहाम्फे इजरायल, अलि अख्तर मिकरानी साउदी अरब र खड्ग केसी जापान रहेका छन्।

भारद्वाज झापाकालीन आन्दोलनका नेता हुन्। उनी ओलीसँगै लामो समय जेल पनि बसेका थिए।

तुम्बाहाम्फे एमालेका ओली पक्षीय केन्द्रीय सदस्य हुन्। मिकरानी मुस्लिम इत्तेहादका कोषाध्यक्ष हुन्। खड्ग केसी त्रिभुवन विश्वविद्यालयको अन्तर्राष्ट्रिय सम्बन्ध तथा कूटनीति कार्यक्रमका संयोजक हुन्। उनी भीम रावल निकट मानिन्छन्।

एमा‌ओवादी कोटाबाट सिफारिशमा परेका मध्ये डेनमार्कका लागि युवनाथ लम्साल द राइजिङ नेपालका कार्यकारी प्रधान सम्पादक हुन्। अस्ट्रेलियाका लागि राजदूत सिफारिश भएका लक्की शेर्पा एमाले छाडेर एमाओवादी प्रवेश गरेकी नेतृ हुन्। बहराइनका लागि सिफारिश भएका पदम सुन्दास दलित अधिकारकर्मी हुन्। एमाओवादीबाट डा. महेन्द्र सिंह कतारका लागि सिफारिश भएका छन्।

त्यस्तै राप्रपा नेपालबाट रसियाका लागि निरञ्जन थापा सिफारिश भएका छन्। थापा पार्टीका उपाध्यक्ष हुन्। उनी पञ्चायती व्यवस्थाका अन्तिम प्रधानमन्त्री मरिचमान सिंह श्रेष्ठको सरकारमा गृहमन्त्री थिए।
दूतावासै नभएको देशमा राजदूत
त्यसैगरी अन्यबाट खगेन्द्र बस्नेत बंगलादेश, भरतबहादुर रायमाझी युएइका लागि राजदूत सिफारिश भएका छन्।

यस्तै परराष्ट्रका कर्मचारीका सिनियरहरु मध्येबाट ताराप्रसाद पोखरेल ब्राजिल, रमेशप्रसाद खनाल जर्मनी, प्रकाशकुमार सुवेदी अष्ट्रिया, लोकबहादुर थापा बेल्जियम, सेवा लम्साल पाकिस्तान, झविन्द्र अर्याल इजिप्ट, ऋषिकेश घिमिरे म्यानमार र दुबसु क्षत्री बेलायतका लागि राजदूत सिफारिश भएका छन्।

अस्ट्रियामा अहिलेसम्म नेपाल सरकारको दूतावास रहेको छैन। हालसम्म २९ देशमा मात्र नेपालको दूतावास रहेको छ। अस्ट्रियामा नयाँ दूतावास खोल्ने गरी राजदूत सिफारिश गरिएको हो। दूतावासै भएको ओमानका लागि भने राजदूत सिफारिश भएको छैन।