काठमाडौं- संघीयताको विरोध गर्दै आएको दल राप्रपा नेपालका अध्यक्षसमेत रहेका उपप्रधानमन्त्री कमल थापाले संघीयता कार्यान्वयनका लागि गठन गरिएको उच्चस्तरीय सरकारी समितिमा सदस्य नबनाएको भन्दै मन्त्रिपरिषद बैठक बहिष्कार गरेका छन्।

प्रधानमन्त्रीनिवास बालुवाटारमा शुक्रबार बिहान बसेको मन्त्रिपरिषद बैठकले प्रधानमन्त्री केपी शर्मा ओलीको अध्यक्षतामा ११ सदस्यीय उच्चस्तरीय समिति गठन गरेको छ।

संघीयता कार्यान्वयन गर्ने मुख्य मन्त्रालयको मन्त्री भए पनि आफूलाई सदस्य नबनाइएको भन्दै थापाले बैठक बहिष्कार गरेको स्रोतले जनाएको छ।

मितिको सदस्यमा उपप्रधानमन्त्री तथा रक्षामन्त्री भीम रावल, अर्थमन्त्री विष्णु पौडेल, गृहमन्त्री शक्ति बस्नेत, कानुनमन्त्री अग्नि खरेल, सामान्य प्रशासनमन्त्री रेखा शर्मा, राष्ट्रिय योजना आयोगका उपाध्यक्ष युवराज खतिवडा छन् भने मुख्यसचिव सोमलाल सुवेदी सदस्य सचिव छन्।

यसअघि पनि केही वैदेशिक मामिलाको विषयमा प्रधानमन्त्री ओलीसँग थापा असन्तुष्ट बनेका थिए। भारतसँग सम्बन्ध सुधारमा आफूले भूमिका निर्वाह गरे पनि त्यसको जस लिनेगरी प्रधानमन्त्रीले अन्य मन्त्रीलाई परिचालन गरेको भन्दै उपप्रधानमन्त्री थापाले असन्तुष्टि पोखेका थिए |