चैत्र २६, २०७२- फिल्ममा जब महिला टेम्पो चालकको आत्मसम्मान र स्वाभिमानको संवाद आउँथ्यो, दर्शकहरू ताली र सिटी मार्थे । बालाजुस्थित बिहीबार अष्टनारायण हलमा बिहीबार सहरका टेम्पो चालकहरू आफूजस्तै मजदुरको कथाव्यथामा बनेको फिल्म ‘टेम्पो चालक’ हेरेर प्रतिक्रिया दिइरहेका थिए ।

हास्य कलाकर्ममा ‘का बेइमान’ को छवि बनाएका रवि डंगोलले निर्देशन गरेको फिल्मको नेपाल यातायात स्वतन्त्र मजदुर संगठनले विशेष सो गरेको थियो । नेवारी, तामाङ र नेपाली गरी तीन भाषामा बनेको यो फिल्म गंगाबहादुर नेमकुलले निर्माण गरेका हुन् ।

रोचक के भने, फिल्ममा नायिकाको रूपमा टेम्पो चालकलाई खेलाइएको थितयो । स्वयम्भू–सुनधारा रुटमा सफा टेम्पो चलाउने धादिङकी कोपिला तामाङलाई आवश्यक तालिमपछि फिल्ममा खेलाइएको निर्देशक डंगोलले जनाए ।

जातीयताको विरुद्ध र समानताको वकालत गरिएको फिल्मले टेम्पो चलाउने एउटी तामाङ युवतीसित काठमाडौंको नेवार युवकको प्रेमकथालाई समातेको छ ।

गाउँको अशिक्षा र अधिक मादक पदार्थ सेवनजस्ता विकृत पक्षलाई पनि फिल्ममा उतारिएको छ । आमा मरेपछि जँड्याहा बाबुबाटै घरेलु हिंसाको सिकार भएकी एक टेम्पो चालक युवतीको ‘आफ्नै टेम्पो किन्ने सपना’ फिल्ममा छ ।

तामाङ र नेवार संस्कृतिको परिवेश बोकेको फिल्ममा रञ्जिता ब्लोन, श्यामसुन्दर शिल्पकार, शान्ति वाइवा, रत्न महर्जन, सन्तोष तामाङ, उदय लामा, अर्नेश्वरी शिल्पकार, रुपक तामाङ, अविसन लामा लगायतले अभिनय गरेका छन् । रवि सायमीको छायांकन रहेको छ ।

सो पछि फिल्मले जातीय सद्भाव र मानवताको पक्षमा वकालत गरेको चलचित्र विकास बोर्डका सदस्य उत्तम केसीले बताए ।

अहिलेको सन्दर्भमा समसामयिक रहेकोले पनि टेम्पो चालकहरूमाझ फिल्म सो गरिएको यातायात स्वतन्त्र मजदुर संगठनका अध्यक्ष नवराज घिमिरेले बताएको समाचार इकान्तिपुरमा छ |