सुरु–सुरुमा मानिसहरू क्यामेराबाट मात्र सेल्फी लिन्थे, पछि सेल्फी स्टिक आयो । अब त जुत्ता, चम्चा, औंठी र काइँयोबाट पनि सेल्फी लिन सकिने भएको छ ।

जुत्ताले खिच्छ सेल्फी

सेल्फी स्टिक बोकेर हिँड्न सजिलो हुँदैन । कतिपय ठाउँमा त सेल्फी स्टिक लिएर हिँड्ने अनुमतिसमेत हुँदैन । त्यसैले अब जुत्ताबाट पनि सेल्फी लिन सक्ने प्रविधि विकसित गरिएका छन् । यस्तो जुत्ता बनाउने कम्पनीले जुत्ताको अघिल्लो भागमा स्मार्टफोन अड्याउने ठाउँ राखिदिएको छ ।
त्यसमा स्मार्टफोन हालेर खुट्टा उचाल्दै सेल्फी लिन सकिन्छ । यसरी सेल्फी लिँदा फोटो खिच्नेको दुईवटै हात फ्री हुनेछ । जुन फोनबाटै लिइने सेल्फीमा सम्भव हुँदैन । कुरा यतिमै सीमित छैन, अब जुत्तामै चार्जरको व्यवस्था गर्ने तयारीसमेत भैरहेको छ ।

चम्चा र काइँयोबाट सेल्फी

त्यस्तो सेल्फी डिभाइसको के काम, जुन डिभाइसबाट जुनसकै बेलामा फोटो खिच्न नसकियोस् । अब खाना–खाजा खाँदाखाँदै पनि सेल्फी लिएर साथीलाई पठाउन सकिनेछ । त्यो पनि खाजा खाने चम्चाबाटै ।

हो, अब सेल्फी डिभाइस चम्चामा पनि जडान गर्न थालिएको छ । यो प्रविधिमा ३० इन्च लामो चम्चाको पछिल्लो भागमा स्मार्टफोन राख्न मिल्ने ठाउँ बनाइएको छ, जसबाट मज्जाले सेल्फी लिन सकिन्छ ।

संसारमा सेल्फीको क्रेज कतिसम्म छ भने अब केश कोर्ने काइँयोबाट पनि सेल्फी लिन सकिनेछ । यस्तो सेल्फी ब्रसको पछिल्लो भागमा फोन अड्याउन सकिन्छ । यो ब्रस आईफोन फिट हुने गरी तयार गरिएको छ । यसबाट केश कोर्दै सेल्फी लिन सकिन्छ ।

औंठीले खिच्ने कि ?

सेल्फी प्रविधिमा नयाँ–नयाँ विकासको क्रममा औंठीले पनि सेल्फी लिने प्रविधिसमेत देखा परेको छ । खासमा हामी एउटा औंलामा मात्र औंठी लगाउँछौं, तर यो प्रविधिमा एकैपटक दुईवटा औंलामा औंठी लगाउनुपर्छ र ती औंठीमा आफ्नो स्मार्टफोन अड्याएर जतिबेला पनि सेल्फी लिन सकिन्छ । – एजेन्सी