बुद्ध संग्रहालय बनाइने, एककरोड रुपैयाँ बजेट विनियोजन
देवदह (रुपन्देही) ; नवगठित देवदह नगरपालिका र देवदह उद्योग वाणिज्य संघको सयुक्त आयोजनामा यहाँ ऐतिहासिक तथा पुरातात्विक महत्वका संग्रहालय निर्माण कार्यक्रम अघि बढाएका छन् ।
बुद्धको जिवनीसँग सम्वन्धित स्थल भएकाले देवदह गाविस नगरपालिकामा गत वर्ष स्तरोन्नती भएसँगै यसलाई आध्यात्मिक क्षेत्र घोषणा गरिएको छ । पर्यटकीय क्षेत्रका रुपमा यसलाई प्रवद्र्धन गर्ने स्थानीयको अठोट छ ।
प्रबद्र्धनको क्रममा फागुन १८ देखि २९ गतेसम्म संचालित दोस्रो देवदह महोत्सवको अवसरमा आयोजित पर्यटन प्रबद्र्धनकालागि रणनीति निर्माण विषयक गोष्ठीमा संग्रहालय निर्माण कार्यक्रमको घोषणा गरियो । यसकालागि नगरपालिकाले एककरोड रुपैयाँ बजेट विनियोजन गरेको देवदह उद्योग वाणिज्य संघका अध्यक्ष एवं महोत्सवका संयोजक गोपाल ढकालले बताए । गुरुयोजना बनाएर काम गरिने उनको भनाई छ ।
देवदह नगर क्षेत्र बुद्धको मावली स्थल हो या होइन भन्ने पत्ता लगाउन पुरातत्व विभागले गत ३ वर्षसम्म लगातार यहाँको कन्यामाई, वैरीमाई र भवानीपुरमा गरेको उत्खनन्बाट प्रप्त भएका सामग्रीहरु संग्रहालयमा संरक्षण गर्ने कार्यक्रम छ । साथै थप अनुसन्धानका लागि पुरातत्व विभागसँग आग्रह गरिने भएको छ ।
यो संग्रहालय पर्यटकको आकर्षणको केन्द्र बन्ने अपेक्षा लिइएको देवदह नगरपालिकाका कार्यकारी अधिकृत गणेश घिमिरेले बताए । गौतम बुद्धको जन्मस्थल लुम्विनीमा आउने स्वदेशी विदेशी पर्यटकलाई यहाँ आकर्षित गरी स्थानियको आर्थिक सशक्तिकरण गराउने कार्यक्रम तय भएको स्थानिय अगुवा भिम गुरुङले बताए ।
यहाँको बोटानिकल गार्डेन, गोल्डेन टेम्पल, बुद्धकालिन मानिएको विशाल पाँकरीको रुख आदि सम्पदाको पनि संरक्षण र प्रवद्र्धन गर्ने कार्यक्रम छ । पर्यटकलाई इच्छाईएको निजी घरमा बास बस्न दिने (होमस्टे) कार्यक्रम संचालन गरिने भएको छ । चुरेको काखमा रहेको रमणियस्थल तराई क्षेत्र भएपनि समशितोष्ण हावापानी भएकाले यो ठाउँ होमस्टेको लागि उपयुक्त मानिएको हो ।
सिरनपुरलाई थारु संस्कृति केन्द्र र सरनबारीलाई मगर संस्कृति केन्द्रको रुपमा प्रवद्र्धन गरी यहाँ होमस्टे कार्यक्रम लक्षित गरिएको छ । यसका लागि नगरपालिकाले पूर्वाधार निर्माणको काम अघि बढाएको र होमस्टे तालिम कार्यक्रम पनि तय गरिएको छ ।