यस्तो रहेछ:इजरायल साइप्रसबाट नेपालीलाई फर्काउने उडान रद्ध हुनुको कारण
तेलअविव: इजरायल र साइप्रसबाट नेपालीलाई जुन २९ र ३० तारिख गरि दुई उडान मार्फत विभिन्न कारणले नेपाल फर्कन नपाएकाहरुका लागि हवाई उडान तय भएकोमा रद्ध भएको नेपाली दुतावासले हिजो जानकारी दिएको थियो । अत्यन्त जरुरी सूचना भनि जारी गरेको सूचनामा रद्ध हुनेको कारण उल्लेख नभएकोले सामाजिक संजालमा विभिन्न प्रतिक्रियाहरु आएका थिए ।
यसै सन्दर्भमा उडान रद्ध हुनुको कारणबारे नेपाली दुतावास इजरायलका उपनियोग प्रमुख अर्जुन घिमिरेले जानकारी दिनु भएको छ । वहाँको भनाई अनुसार – हामी एक दुःखद निर्णय गर्न बाध्य भयौं । यसको बिरोध भइरहेको छ जुन एक हदसम्म स्वभाविक छ। यहाँका नेपालीहरुले हामीले भनेअनुसार तयारी गर्नुभयो तर तोकिएको दिनमा जान नपाउने सुनेर निराश हुनु सामान्य हो। यसको जिम्मेवारी हामीले लिनै पर्छ, जसबाट हामी पन्छिदैनौ। तर यस पछाडिको वास्तविकता तपाईंहरूलाई जानकारी गराउन आवश्यक ठान्दछु।
नेपालका एयरलाइन्सहरुले यूरोपमा उडान भर्न पाउँदैनन् भन्ने हामीलाई जानकारी थियो, सरकारले ईजरायल र साईप्रसका लागि हिमालयन एयरलाइन्स र नेपाल एयरलाइन्सका १/१ उडान तय गरेपश्चात् हामीले यस बारेमा शुरुमै कुरा राखेका थियौं। त्यसैले हिमालयन एयरलाइन्स आफू उडान भर्न नसक्ने भनी पछि हट्यो र दुबै उडान नेपाल एयरलाइन्सले गर्ने भयो। नेपाल एयरलाइन्सलाई पनि यसबारे जानकारी गराएका थियौं तर यो सामान्य कुरा हो, अनुमति आइहाल्छ भनिसकेपछि हामीले पनि प्रक्रिया सुरु गर्यौं।
प्रक्रिया शुरु भए पश्चात् पनि अन्य केही देशमा जस्तै अन्तिम चरणमा पुगेपछी उडान रद्द नहोस् भनी हामीले उडानलाई २० र २५ जुन बाट सारेर ३० जुनका लागि तय गरी अनुमतिको प्रक्रिया अगाडि बढायौं। जुन ३० मा हुने भनिएका उडानहरु व्यावसायिक नभएका र उद्धारका लागि आउन लागेकाले मानवीय हिसाबले उडान अनुमति दिने विश्वास नेपाल एयरलाइन्सले लिएको देखियो । तर साईप्रसले ल्याण्डडिङ परमिट दिएन। दूतावासको सघन कुटनैतिक पहलका वावजुद साईप्रस सरकारले आफ्नो चाहना हुँदाहुँदै पनि युरोपेली संघको नियमका कारण अनुमति दिन नसकेको जानकारी गरायो।
अब उडान रद्द गर्नुको विकल्प थिएन र सोही अनुसार आज यस्तो निर्णय गरियो। दूतावासको तदारुकताले गर्दा एक हप्ता अगाडि नै सूचना जारी गरी कोरोना परीक्षणबापत अनावश्यक पैसा खर्च हुन दिइएन, नयाँ टिकट बुक गर्न पनि रोक लगाइएको छ।
निकै प्रयास गर्दा पनि दुतावासले मिति सार्नबाट भने रोक्न सकिएन। तर नेपाली एअरलाइन्सहरु नआउने भएपछि अन्य केही विदेशी एयरलाइन्स सँग कुराकानी अगाडि बढिसकेको छ। छिटै नै (१/२ दिनमै)यसको बारेमा दूतावासले सूचना सार्वजनिक गर्नेछ र ईजरायल र साईप्रसबाट नेपालीहरुलाई स्वदेश फर्काउनेछ ।
युरोपमा उडानको अनुमति नदिने गरी कालोसूचीमा
नेपाली एयरलाइन्सहरुलाई युरोपमा उडानको अनुमतिमा प्रतिबन्ध गरेर कालोसूचीमा राखेको छ । इयुले नेपाली हवाइसेवा कम्पनीले सुरक्षा मापदण्डहरु पुरा नगेको आरोपमा इयुले कालोसूचीमा राखेको हो ।
एयर डाइनेस्टी, एयर काष्ठमण्डप, बुद्ध एयर, फिस्टेल एयर, गोमा एयर, हिमालयन एयरलाइन्स, मकालु एयर, मनाङ एयर, माउन्टेन हेलिकप्टर्स, मुक्तिनाथ एयर, नेपाल वायुसेवा निगम, सौर्य एयरलाइन्स, श्री एयरलाइन्स, सिमि्रक एयर, सीता एयर, तारा एयर र यती एयरलाइन्स इयुको कालोसूचीमा रहेको छ ।
नेपाल सरकारले इयुको कालोसुचिबाट हटाउन प्रयास र पहल गरेको बताएपनि खुलाउन सकेको छैन ।लामो समयदेखि इयुले नेपाली एयरलाइसन्सलाई कालोसूचीमा राख्दै आएको छ ।यसले नेपालको हवाइसेवा अझै नसुध्रिएको नेपाली आकाश अझै जोखिमूपर्ण रहेको सन्देश दिएको छ ।
अन्तर्राष्ट्रिय रुपमा राम्रो कुटनीतिक पहल नहुँदा इयुले नेपाली हवाइ सेवाकालाई कालोसूचीमा कायमै राखेको छ ।