तमु ल्होसारमा सार्वजनिक विदा माग्दै माइतीघरमा प्रदर्शन
याम्बु । तमु ल्होसारमा माईतीघरमा सार्वजनिक बिदा दिनुपर्छ भन्दै माईतीघरमा प्रदर्शन गरेको छ । आईतबार माइतीघर मण्डलमा पुस १५ गते सावजनिक बिदा दिन माग गर्दै प्रदर्शन गरेका हो ।यस अघि आदिवासी जनजाति समुदायले आफूहरुको चाडपर्वमा राष्ट्रिय विदा दिन माग गर्दै गत साता माइतीघरमा प्रर्दशन गरेको थियो ।
नेपाल आदिवासी जनजाति महासंघको आह्वानमा विभिन्न आदिवासी जनजाति समुदायले आफ्नो चाडपर्वमा राष्ट्रिय विदा दिन माग गर्दै प्रदर्शन गरेका थिए । तमु ल्होसार, ग्याल्बो ल्होसार, सोनाम ल्होसार, उधौली, उभौली, माघी, माघे संक्रान्तिलगायतमा सार्वजनिक बिदा दिन माग गर्दै उनीहरुले प्रदर्शन गरेका थिए ।
तमु ल्होसार (पुस १५) मा सार्वजनिक बिदा दिन माग गर्दै बुटवलमा प्रदर्शन
बुटवल । तमु ल्होसार (पुस १५) मा सार्वजनिक बिदा दिन माग गर्दै गुरुङ समुदायले आइतबार बुटवलमा प्रदर्शन गरेका छन् । तमु ह्युल छोंज धी गुरुङ राष्ट्रिय परिषद रुपन्देहीको नेतृत्वमा सामाजिक विकास मन्त्रालय अगाडि मिलनचोकमा प्लेकार्डसहित प्रदर्शन भएको हो ।
एक हजार बढीको संख्यामा जातीय भेषभुषामा उपस्थित गुरुङ समुदायले भुड्कीचोकदेखि मिलनचोकसम्म मुख्य राजमार्गको पश्चिमतर्फ प्रदर्शन गरेका हुन् । उनीहरुले ल्होसारमा सार्वजनिक बिदा दिनुपर्ने, धर्म निरपेक्ष राष्ट्रमा सांस्कृतिक विभेद अन्त्य गरिनुपर्ने लगायतका नारा लेखिएका प्लेकार्ड प्रदर्शन गरेका हुन् ।
प्रदर्शनपछि सामाजिक विकास मन्त्रालय अगाडि आयोजित कोणसभामा गुरुङ राष्ट्रिय परिषदका केन्द्रीय सहकोषाध्यक्ष टौबहादुर गुरुङ,प्रदेश उपाध्यक्ष धनबहादुर गुरुङ,रुपन्देही सचिव ओमप्रकाश गुरुङ लगायतले सरकारले आदिवासी जनजातिका तमु ल्होसारसहित उधौली उभौली, सोनाम ल्होसार, ग्याल्पो ल्होसार र माघे संक्रान्तिमा सार्वजनिक विदा नदिएमा आदिवासी जनजाति महासंघको नेतृत्वमा सशक्त आन्दोलनमा उत्रिने बताए ।
ल्होसारमा सार्वजनिक बिदा माग गर्दै सोमबार प्रदेश ५ का मुख्यमन्त्रीमार्फत संघीय सरकारलाई ज्ञापनपत्र बुझाउने कार्यक्रम रहेको गुरुङ राष्ट्रिय परिषद प्रदेश ५ का सचिव एलबी गुरुङले बताए ।
तमु ल्होसारमा बिदा माग्दै पोखरामा पनि प्रदर्शन
पोखरा । गुरुङ समुदायको ठूलो पर्व तमु ल्होसार (पुस १५) मा सरकारले राष्ट्रिय बिदा कटौती गरेको भन्दै पोखरामा आइतबार प्रदर्शन भएको छ । तमु ह्युल छोंज धिंको अगुवाइमा पोखराको चिप्लेढुंगामा प्रदर्शन भएको हो ।
गुरुङ समुदायसहित सम्पूर्ण जनजातिको पर्वलाई राष्ट्रिय पर्वबाट हटाइ राज्यले भेदभावपूर्ण व्यवहार गरेको उपस्थितको आरोप थियो । राज्यले धर्म निरपेक्षता घोषणा गरे पनि भेदभाव गरिरहेको उनीहरुको भनाइ थियो ।
‘ल्होसार गुरुङ समुदायको सबैभन्दा ठूलो पर्व हो । अहिले आएर राज्यले यसलाई एउटा जातको पर्वमामात्रै सीमित गर्न खोजेको छ,’ धिंका केन्द्रीय उपाध्यक्ष मनोज गुरुङले आक्रोश पोखे, ‘सम्पूर्ण जनजातिलाई अपहेलना गर्दै जम्मा ५ दिनमात्रै बिदामा सीमित गरेको छ ।’ उनले राज्यले निर्णय नसच्याउँदासम्म आन्दोलन कडा रुपमा जारी राख्ने चेतनावनी दिए ।
ठूलो संख्यामा जम्मा भएका गुरुङ समुदायका प्रदर्शनकारीले ‘तमु ल्होसारलाई सार्वजनिक बिदा कायम गर्, के सरकार एउटामात्रै समदायको हो र ?, नेपालका सबै जातजातिका संस्कृतिलाई समान व्यवहार गर्,’ लगायत प्लेकार्डसहित विरोध प्रदर्शन गरेका थिए । ल्होसार पुस १५ गते मनाइँदैछ ।