याम्बु – नेपाल आदिवासी जनजाति महासंघ (नेफिन) को संयोजनमा नेपालका आदिवासी जनजातिहरुको पहिलो अन्तर्राष्ट्रिय सम्मेलन आगामी कात्तिक १ र २ गते काठमाडौंमा हुने भएको हो ।

महासंघका अध्यक्ष जगतबहादुर बराम र उपाध्यक्ष तथा विदेश विभाग इञ्चार्ज गोविन्द छन्त्यालले अन्तर्राष्ट्रिय सम्मेलनमा सहभागी हुन देश तथा विदेशका संस्थाहरुलाई निमन्त्रणा पठाई सकेको जानकारी तामाङअनलाइनले प्राप्त गरेको छ ।

‘विभिन्न उद्देश्यले संसारभरका विभिन्न देशहरूमा रहेर पनि नेपाल आदिवासी जनजाति महासंघको झण्डामा गोलबन्द भई नेपालका आदिवासी जनजातिको पहिचान र अधिकार प्राप्तिको आन्दोलनका लागि निरन्तर योगदान गरिरहेको स्मरण गर्दै गराउँदै परिवर्तित सन्दर्भमा संसारभरका नेपाली आदिवासी जनजातिहरूको बीचमा आपसी सम्बन्ध बिस्तार, सुदृढ र सांगठनिक सञ्जालमार्फत जोड्ने जोडिने उद्देश्यले आदिवासी जनजाति अन्तर्राष्ट्रिय सम्मेलन गर्न गराउन गइरहेको स्पष्ट पर्दछौं’ निमन्त्रणा भनिएको छ ।

अन्तर्राष्ट्रिय सम्मेलनलाई सफल बनाउन नेफिन संघीय परिषद् सचिवालयका सम्पूर्ण पदाधिकारी र सल्लाहकारहरू, नेफिनका पूर्व प्रमुखहरू, नेफिनका आदिवासी जनजातीय संगठनहरू र सम्बन्धन संगठनहरूको तर्फबाट एक÷एक जना महिला र पुरुष गरी दुई जना, नेफिनको प्रदेश समन्वय परिषद्का अध्यक्ष र संयोजकहरू, विदेशस्थित नेफिन सम्बन्धन शाखाहरूको तर्फबाट दुई–दुई जना महिला र पुरुष गरी चार जना र आवश्यक अन्य आदिवासी जनजाति आन्दोलनका व्यक्तित्वहरू प्रतिनिधिको रुपमा उपस्थिति हुने समेत जानकारी गराएको छ ।

विदेशमा रहेर नेपालको आदिवासी जनजाति आन्दोलनलाई विभिन्न समयमा पुरयाएका, आर्थिक, नैतिक, भौतिकलगायत विविध खाले सहयोग र योगदानको उच्च कदर गर्दै आदिवासी जनजाति अन्तर्राष्ट्रिय सम्मेलनलाई सफल बनाउन एकअर्काबीच हातेमालोका लागि समेत महासंघले आग्रह गरेको छ ।