रसुवामा प्रहरीद्वारा कन्टेनर धनी आशिष तामाङ कुटिए,पीडित पक्षद्वारा प्रहरी चौकी तोडफोड
रसुवा – रसुवाको गोसाईंकुण्ड गाउँपालिका–२, टिमुरेमा प्रहरीले सार्वजनिक स्थलमा एक व्यक्तिलाई कुटपिट गरेका छन् । मंगलबार साँझ साढे ४ बजे गलत ठाउँमा कन्टेनर पार्किङ गरेको भन्दै प्रहरीले अपशब्द बोलेपछि सामान्य भनाभन भएको थियो । ना ६ ख ४९२५ कन्टेनर धनी आशिष तामाङसँग सामान्य भनाभन भएपछि प्रहरीले कुटपिट गरेका थिए ।
उक्त घटनाको सार्वजनिक भिडिओमा प्रहरीले चालकलाई लात्ती प्रहार गरेका छन्, कपालमा समातेर लडाएका छन्। भिडिओ सार्वजनिक भएपछि प्रहरीको सर्वत्र आलोचना भइरहेको छ।
यो घटनाको स्थानीयले विरोध पनि गरे। तर, प्रहरीले नटेरेको देखिएको छ। ड्राइभरको इज्जत छैन? यसरी कुटपिट गर्न मिल्छ? भन्दा ती प्रहरीले स्थानीयलाई नै हपारेका थिए।
तामाङमाथि कुटपिट गर्ने प्रहरी चौकी टिमुरेका प्रमुखको राजीनामाका साथै कुटपिटमा संलग्न प्रहरीको निलम्बनको माग गर्दै पीडित पक्षले राति १२ बजेसम्म प्रदर्शन गरेका थिए । प्रदर्शनकारीले टिमुरेको अस्थायी प्रहरी चौकी तोडफोड गरेका प्रहरीले जनाएको छ ।
दिउँसो सामान्य भनाभनमा कुटपिट गर्ने प्रहरी राति तोडफोड हुँदा भने संयमित भएको थियो । सामाजिक सञ्जालमा भिडियो भाइरल भएपछि जिल्ला प्रहरी कार्यालय रसुवाले हतारमा विज्ञप्ति जारी गरेको थियो ।
विज्ञप्तिको चौतर्फी विरोध भएको छ । घटनाबारे छानबिन भइरहेको प्रमुख जिल्ला अधिकारी अर्जुन भण्डारीले बताउनुभयो । कुटपिटको विषयमा छानबिन गर्न प्रजिअ भण्डारीको टोली टिमुरेमा टिमुरे पुगेको छ ।
सुरक्षा निकायका प्रमुख, राजनीतिक दलका प्रमुख, टिमुरेका प्रहरी तथा पीडितका समर्थकहरूसहित छलफल सुरु भएको प्रजिअ भण्डारीले बताउनुभयो । मंगलबार दिउँसो प्रहरीले कुटपिट गरेको भिडियो सामाजिक सञ्जालमा भाइरल भएपछि प्रजिअको टोलीले घटनास्थलमा नै पुगेर छानबिन सुरु गरेको हो ।