लण्डन : नेपाल भ्रमण बर्ष २०२० लाई लक्ष्य गर्दै विश्व आदिवासी दिवसको अवसरमा लण्डनस्थित नेपाली म्युजिक र फुड फेस्टिबल आयोजना गरिएको छ।

नेपाली दूतावासको आयोजनामा शनिवार नेपाली म्युजिक र फुड फेस्टिबल आयोजना गरिएको हो । दुतावासको प्राङगणमा आयोजना गरिएको फस्टिबलमा आदिवासी जनजातिका भेषभुषा, खाना लगायतका विभिन्न सामग्रीहरु प्रर्दशनी गरिएको थियो । कार्यक्रममा विभिन्न जातजातिहरुको झाँकी र साँस्कृतिक गीत, नृत्यहरु प्रस्तुत गरिएको थियो ।

प्रकृति र संस्कृतिको देश नेपाल, सुन्दर र विविधताले भरिएको कारण जिवन्त र समृद्धिको खानी भएकाले समृद्धि र जीवन्त नेपाल निमार्णमा आदीवासी जनजातिको महत्वपूर्ण योगदान रहेकाले कार्यक्रम आयोजना गरिएको बेलायतका लागि नेपाली राजदूत दुर्गाबहादुर सुवेदीले बताए ।

‘नेपालको आदिवासी जनजातिहरुको संस्कृति मौलिक संस्कृति हो । नेपाल जनजातिहरुको संस्कार र सस्कृति सम्पति हो । आदिवासी जनजातिहरुको कला र संगीत नेपालको अभिन्न अंग हो । उनीहरुले प्रयोग गर्ने भाषा र भेषभुषा नेपालको नेपालका राष्ट्र भाषा हुन,’ राजदुत सेवेदीले भने ‘आदिवासी जनजातिहरुको खाना र परिकार मौलिक हुन । त्यसैले विविधता भित्रको बास्तविक सुन्दरता आदीवासी जनजातीहरुको समृद्धि र झल्को दिन यसले टेवा पुग्ने छ ।’

नेपाल विविध जाति भएको देश विविधताभित्र अनेकता रहेको बताउँदै उनले  अनेकताभित्र सबै नेपालीमा एकता पनि रहेको चर्चा गरे।

कार्यक्रमले नेपालमा पर्यटक भित्राउनका लागि महत्वपुर्ण योगदान दिने बताउँदै नेपाल आदिवासी जनजाति महासंघ बेलायतका संस्थापक अध्यक्ष थर्क रानाले यसबाट आदिवासी जनजातिहरुको संस्कार संस्कृति जीवन्त राख्न मद्दत पुग्ने बताए ।

विदेशमा यस्ता कार्यक्रम हुनुले संस्कार संस्कृति जीवन्त राख्दै यसबाट नयाँ पुस्तालाई संस्कृति हस्तान्तरण गर्न पनि सहयोग पुग्ने किरात राई यायोक्खा बेलायतका अध्यक्ष कल्पना राईले बताइन । नेपाल भ्रमण वर्ष २०२० लागि लक्षित कार्यक्रमलाई यसबाट ठुलो टेवा पुग्ने समेत राईले बताइन् ।

कार्यक्रममा विभिन्न देशका राजदुतहरुलाई समेत निम्ता दिइएको थियो । उनीहरुलाई आदीवासी जनजातिहरुको खाना र प्रर्दशनी गरिएको सामग्रीहरुलाई देखाइएको थियो । कार्यक्रममा नेपाली ख्यातीप्राप्त गायक दीप श्रेष्ठ लगायत अन्य गायक गायिकाहरुले आफ्ना प्रस्तुति दिएको थिए । कार्यक्रममा चर्चित नायिका दीया पुनको समेत उपस्थिति थियो । किरण राई /थाहखबर