फोरम र नयाँ शक्तिको एकीकरण २१ गते टुंगो लाग्ने
काठमाडौं । सत्तारुढ संघीय समाजवादी फोरम नेपाल र नयाँ शक्तिबीच पार्टी एकीकरण प्रक्रिया अन्तिम चरणमा पुगेको छ । उपप्रधानमन्त्री उपेन्द्र यादव नेतृत्वको समाजवादी फोरम र डा. बाबुराम भट्टराई नेतृत्वको नयाँ शक्तिबीच दोस्रो पटक एकीकरणको प्रक्रिया अन्तिम चरणमा पुगेको हो ।
यही वैशाख २१ गते बस्ने फोरमको केन्द्रीय समिति बैठकले पार्टी एकीकरणको विषयमा अन्तिम टुंगो लगाउने नेता प्रमोद गुप्ताले जानकारी दिएका छन् । ‘‘हामीबीच पार्टी एकीकरण गर्ने विषयको छलफल अन्तिम चरणमा पुगेको छ । २१ गते बस्ने केन्द्रीय कमिति बैठकले यसका बारेमा निर्णय गर्छ,’’ उनले भने । केन्द्रीय कमिटि बैठकले अन्तिम निर्णय गरे त्यसको एक दुई दिनमै पार्टी एकीकरणले अन्तिम रुप लिने गुप्ताको भनाइ छ ।
दुवै पार्टीले गठन गरेको वार्ता टोलीले एकीकृत पार्टीको नाम समाजवादी पार्टी राख्ने प्रस्ताव गरेको स्रोतको भनाइ छ । एकीकृत पार्टीमा दुई अध्यक्ष रहने बताइएको छ । संघीय परिषद्को अध्यक्षता भट्टराईले र केन्द्रीय समितिको अध्यक्षता यादवले गर्ने सहमति जुटेको छ । पार्टीको पदाधिकारीमा फोरमबाट १६ र नयाँ शक्तिबाट ९ जना रहने भनिएको छ । तर, नेताहरुले यसको पुष्टि भने नगरेको बाह्रखरीमा समाचार छ |
यसअघि स्थानीय तहको निर्वाचनका बेला पनि फोरम र नयाँ शक्तिबीच एकीकरणको प्रक्रिया अन्तिम चरणमा पुगेको थियो । तर, नेतृत्वमा सहमति नहुँदा दुई पार्टीबीचको एकता प्रक्रिया रोकिएको थियो ।बाह्रखरीसँग