हेडलाईन

बुद्धभूमिमा हिन्दू रामकथा प्रवचन रोक्न घेदुङको माग         शेर्पा किदुग रोमानियाको दोस्रो अधिवेशन सम्पन्न         रोमानियामा पहिलोपटक सोनाम ल्होछार (तावार ल्हो) भव्य र सभ्य रुपमा सम्पन्न         तामाङ समाज पोर्तुगलले विविध कार्यक्रम गरी मनायाे सोनाम ल्होसार !         डेनमार्कमा सोनाम ल्होछार २८५९ मनाउनको साथै नयाँ कार्य समिति गठन         नेपाल तामाङ घेदुङ इजरायल         क्यानाडामा सोनाम ल्होछार २८५९ भव्य रुपमा सम्पन्न         सोनाम ल्होछार २८५९ तावार ल्हो टुँडिखेलमा ३ दिन मनाइने         पृथ्वी जयन्ती र राष्ट्रिय एकता दिवस         रोमानियामा तामाङ घेदुङ गठन, सोनाम ल्होछार मनाउने तयारी         नेपाली राष्ट्रिय पर्व सोनाम ल्होछार र तामाङ जाती         डम्फू र तामाङ भेषभूषा अंकित हुलाक टिकट प्रकाशित         प्रवासमा सोनाम ल्होछार २८५९ कहाँ कहाँ मनाउदै र को को कलाकार सहभागी हुदै         जापानको विभिन्न शहरमा सोनाम ल्होछार २८५९ मनाउदै         स्विट्ज़रलैन्डमा सोनाम ल्होछार २८५९ भव्यताको साथ मनाउदै        

साली, तेरो बाउको गाडी हो र ?’

शिक्षा रिसाल

काठमाडौंमा ट्याक्सी चालकको मनोमानी नयाँ कुरा होइन । आफूले भनेजस्तो नभए जुन तहमा पनि उत्रने ट्याक्सी चालकको संख्या पनि कम छैन यो सहरमा । कोही यात्रु आफूलाई चित्त नबुझेको कुरामा ट्याक्सी चालकसँग झगडा पनि गर्छन् भने कोही सहिदिन्छन् ।

सार्वजनिक सवारी साधन नै प्रयोग गर्ने जोसुकैलाई पनि कहिलेकाहीँ अपर्झट पर्दा ट्याक्सी चढ्नै पर्ने बाध्यता हुन्छ । म पनि यसै वर्गमा पर्छु । मैले पनि ट्याक्सी चालकहरूसँग झगडा गर्नुपरेको छ ।

गत साता ललितपुरको हरिहरभवनबाट काठमाडौंको सुन्धारा पुग्नु थियो । हतार भएकाले एउटा ट्याक्सी रोकेर नजिकै गएर ‘सुन्धारा चाइनाटाउन गेट पुर्‍याइदिनुस् न’ भने ।

ट्याक्सीचालकले ‘हुन्छ’ भनेपछि ढोका खोलेर बसिहालेँ । ढोका लगाउन नपाउँदै ट्याक्सी हुइँकी हाल्यो । त्रिपुरेश्वर पुगेपछि मिटरमा मेरो आँखा पुग्यो । मिटर त चलाएकै रहेनछ । मैले झटपट सोधेँ, ‘तपाईंले मिटर अन गर्नु भएको थिएन र ?’

उनले हाँस्दै भने, ‘अब तपाईंले सोध्नुपनि भएन, के मिटर अन गर्नु ।’

मान्छे हालेपछि त रिंगरोड भित्र गुडाउने, त्यो पनि यति दिउँसै, मिटर त अन हुनुपर्छ नि ।’

उनले ठट्यौली पाराले भने, ‘हेर्नुस दिदी, मेरो ट्याक्सीमा त कहिल्यै मिटर नै चल्दैन ।’

मेरो दिमागले यसै पनि काम गरिरहेको थिएन । ट्याक्सी चालकको त्यो रवैया मलाई चित्त बुझेन । यति भन्दा भन्दै चाइना टाउन गेट आइपुग्यो । गेट अगाडि एउटा ट्राफिक सिठ्ठी फुक्दै बसेका थिए । ट्याक्सी चालकको झर्को र फर्को अनि मिटर नचलाएको कम्प्लेन गरिदिन पाउँछु भनेर अलि ढुक्क भए ।

अझ मान्ला कि भनेर ‘ट्राफिकलाई भनिदिऊँ?’ मैले चालकलाई डर देखाउन खोजें ।

चालकले पनि ट्राफिक अगाडि गएर ट्याक्सीको गति कम गरेर भने ‘ल गुनासो गर्नुस्’ ।

मैले ट्याक्सीभित्रैबाट ट्राफिकतर्फ हेर्दै भने, ‘हेर्नुस् सर, मिटर चलाउँदैनन् रे । अझ झगडा गर्दै छन् ।’

ट्राफिकले खासै वास्ता गरेनन् । म छक्क परेँ ट्राफिकको व्यवहार देखेर । उनले मजाकमै भने, ‘ल ल भाइ, मिटर चलाऊ, नत्र कारवाही होला… हाहाहाहा ।’

ट्याक्सी ड्राइभर ‘ल भयो त अब दिनुस् दुई चार सय रुपैयाँ । मान्छे हेर्दा त सधैँ ट्याक्सी नै चढ्नुहुन्छ जस्तो छ ।’

मलाई ट्राफिक र ट्याक्सी चालक दुवैको व्यवहारले निराश र खिन्न बनायोे । मैले एक सय रुपैयाँ दिएर ओर्लन खोजेँ र भने, ‘मिटर चलाउनु भएन उल्टै झगडा गर्नुभयो । म यसभन्दा धेरै दिन्न ।’ म ओर्लनै लागेको के थिएँ ‘साली, तेरो बाउको गाडी हो र ? मेरो गाडीमा मिटर चलाऊँ कि नचलाऊँ तँलाई के मतलब ?’ म नबोली ट्याक्सीबाट ओर्लिए र ढोका ढ्याम्म लगाइदिएँ । भित्रबाट फेरि अश्लील शब्द प्रयोग गर्दै ऊ करायो, ‘ओइ भन थुइक्क तेरो बाउको ट्याक्सी हो, ढोका यसरी लगाउने ? मान्छे देख्दा त राम्रै देखिन्छेस्, साली, औकात हेर् त ।’ उसले मुखमा आएजति मलाई गाली गर्‍यो । मैले सहन सकिन अनि फर्केर ट्याक्सी भएको ठाउँमा गएँ  । ‘के भनिस् ? फेरि भन् ।’ उसले फेरी त्यहि कुरा दोहोर्‍याउँदै मुखमा आए जति सबै अश्लील शब्द बोल्यो । मैले ट्याक्सीको नम्बरको फोटो खिच्न मोबाइल झिकेँ । ट्याक्सी नम्बर थियो – बा २ ज १२९५ ।

मैले मोबाइलबाट फोटो खिच्न खोजेँ । झोलाबाट मोवाइल झिक्दा नझिक्दै ट्याक्सी ब्याक गर्‍यो । म तर्सिएँ, तस्बिर हल्लियो । ट्याक्सी फेरि अगाडि बढ्यो । यो घटना कार्तिक २६ गते दिउँसो तीन बजेको हो ।

मैले १०३ मा फोन गरेर घटनाको सबै बेलिबिस्तार लगाएँ ।

‘यसमा मेरो केही गल्ती छ त सर ?’ मैले सोधेँ ।

‘छैन छैन । गल्ती सबै ट्याक्सीको हो । अझ अभद्र व्यवहार पनि गरेछ । हामी पत्ता लगाउने कोसिस गछौँ,’ उताबाट जवाफ आयो ।

मैले ट्विटरमा पनि @valleytraffic  लाई उल्लेख गरेर ट्याक्सी नम्बरको फोटोसहित घटनाको विस्तृत जानकारी गराएँ । भ्याली ट्राफिकको रिप्लाई पनि आयो, ‘हामी यो ट्याक्सीलाई खोजेर कारवाही गर्नेछौँ ।’

मैले गरेको ट्विटमा धेरैको रिप्लाई आयो । धेरैले आफ्नो अनुभव पनि साटेँ ।

 

ती धेरै रिप्लाइमध्ये एउटा थियो ‘मलाई पनि एकपटक यस्तै नै परेको थियो तर (ममाथि उल्टै प्रश्न तेर्सियो) दुर्व्यवहार गर्‍यो भन्ने प्रमाण के छ र ?’

मैले केही जवाफ दिन सकिन ।

आफूलाई खास सन्चो नभएका कारण मैले धेरै सोच्न पनि सकिरहेको थिइन । आफूसँग मोबाइल थियो । ट्याक्सी चालकले निहुँ खोज्न थालेदेखि नै मैले रेकर्ड गर्न पनि सक्थेँ । त्यो प्रमाण पनि बन्न सक्थ्यो र थप कारवाहीका लागि बल पनि पुग्न सक्थ्यो ।

त्यसबाहेक, आफूलाई खिन्न लागेको अर्को एउटा कुरा छ । प्रहरीले आफू जनताको साथी भनेर भनेको भन्यै छ । समय समयमा ट्राफिक प्रहरीले ट्याक्सी मिटरमा जान नमाने १०३ मा फोन गर्नुस् पनि भनेको छ । यही कुरा ड्युटीमा रहेका एक जना ट्राफिक प्रहरीलाई उजुरी गर्दा मिटर नचलाएको ट्याक्सीलाई हाँसेर ‘जाऊ जाऊ’ भनिदिए ।

केही महिनाअघि त्यहि स्थानमा खुट्टा कुल्चेर भागेको ट्याक्सीलाई सीसीटीभी फुटेजको आधारमा पक्राउ गरेको प्रहरीप्रति रहेको मेरो आशा यो घटनाले निराश बनाइदियो । सामाजिक सञ्जालमा भ्याली ट्राफिकको रिप्लाई त आयो तर अहिलेसम्म त्यो ट्याक्सी पत्ता लागेको छैन । बारम्बार १०३ मा फोन गर्दा ‘हनुमान ढोका आएर निवेदन दिनुस् अनि खोज्न थाल्छौं’ भन्ने जवाफ आयो ।

ट्याक्सी सँगको यो पहिलो घटना भने होइन । केही महिनाअघि पनि सानेपा जान सुन्धाराबाट ट्याक्सी ड्राइभरलाई सोध्दा ४ सय रुपैयाँ माग्यो । मैले मिटर चल्दैन र भनेर सोध्दा उनको जवाफ पनि त्यही थियो ‘अहँ, मेरो ट्याक्सीमा कहिल्यै मिटर नै चल्दैन’ यति भन्दै ट्याक्सी हुइक्यायो र मेरो दाहिने खुट्टामा चक्का चढाएर गयो । त्यतिबेला त मैले दुखाईका कारण फोटो लिन पनि सकिन । सहयोगी कोही पनि थिएन । आफैँ अस्पताल पुगे अर्को ट्याक्सी चढेर । डाक्टरले एक्सरे गरेपछि लिगामेन्ट अलिकति च्यातिएको बताए । दुई साताआराम गर्न भन्दै एन्टिबायोटिक पनि लेखिदिए ।

त्यो पनि ट्विटरमा ट्विट गरें तर ट्याक्सी नम्बर पत्ता लगाउन सकिएन । मलाई त्यतिबेला पनि ट्याक्सीलाई कारवाही होला भन्ने पटक्कै विश्वास थिएन । तर, एक ट्विटर प्रयोगकर्ताले फोन गरे र उजुरीका लागि प्रहरीको सिसिटिभी कन्ट्रोलको नम्बर दिए । एक त डाक्टरले दुई साता आराम गर्नु भनेको छ, इन्सपेक्टर भन्छन् तुरुन्त रत्नपार्क आएर सीसीटीभी फुटेज हेनुर््स अनि पत्ता लाग्छ । फेरि ट्याक्सीमै गएँ । सीसीटीभी फुटेज धेरै समयपछि बल्ल तल्ल पत्ता लाग्यो । सीसीटीभी फुटेज पत्ता लागेपछि फेरि हनुमान ढोका गएर ट्याक्सी नम्बर बा १ ज ४१४४ उल्लेख गरेर निवेदन दिनुस् भने ।

निवेदन दिने ९ नम्बरको कोठाका कर्मचारीले वास्तै गरेनन् । ट्याक्सीले कसरी हान्यो के ग¥यो सबै बेलिविस्तार लगाएँ पनि । धेरै पछि हाइ गर्दै ‘ल निवेदन लेखेर छोड्नुस्, अब पत्ता लागेपछि तपार्इंलाई खबर गरौँला’ भने ।

‘कहिले पत्ता लाग्छ होला?’ मैले सोधेँ ।

‘अब हेर्नुस्, यो सहरमा हजारौँ ट्याक्सी गुड्छन् । कसरी पत्ता लगाउनु । पत्ता लागेपछि खबर गरौंला भनेकै छौँ नि । चुप लागेर जानुस अहिले’, जवाफ आयो ।

म बाहिरिएँ ।

फेरि उही ट्विटर प्रयोगकर्तालाई फोन गरेर गुनासो पोखेँ । उनले ‘म हेरिदिन्छु । कुरा गर्छु’ भन्दै आश्वासन दिए ।

भोलिपल्ट ट्याक्सी पत्ता लाग्यो, तर, प्रहरीको नजिकका मान्छेको सोर्सले । ट्याक्सी चालकलाई प्रहरीले पक्राउ गरेर मलाई उपचारको क्षतिपूर्ति दिलाए ।

दोस्रो घटनामा भने अगाडि नै ट्राफिक प्रहरीलाई जानकारी गराउँदा र ट्याक्सी नम्बर सार्वजनिक गर्दा पनि कुनै कारबाही भएन । केही भयो कि भनेर पुनः तेस्रो दिन १०३ मा फोन गरेर बुझ्न खोजे ।

‘खोज्दैछौँ, पत्ता लागेको छैन । फेरि तपार्इंको केस त्यति सिरियस पनि हैन नि’, उताबाट जवाफ आयो ।

काठमाडौं सहर धेरै ठूलो पनि छैन । इच्छाशक्ति हुने हो भने ट्याक्सी नम्बर नै दिएपछि पत्ता लगाउन धेरै समय लाग्नै हुँदैन । नियम र कानुनको पालना गराउनका लागि खटिएका प्रहरीले गम्भीरतापूर्वक काम गर्ने हो भने सम्भवतः कोही पनि ट्याक्सीको मनोमानीको सिकार बन्नु पर्दैनथ्यो कि ?






शुभकामना

भर्खरै...

लोकप्रिय

रोचक खबर

अन्तर्राष्ट्रिय कलाकार मंच इजरायल शाखाको अध्यक्षमा युनिका गुरुङ चयन

तेलअविव - अन्तर्राष्ट्रिय कलाकार मंच इजरायल शाखाको १०औं वार्षिकोत्सव तथा साधारण सभा सम्पन्न भएको छ ।संस्थाका... बाँकी यता

tamang online / June 20, 2022

चलचित्र कबड्डि ४ यथाशिघ्र प्रदर्शन रोक्न माग गर्दै मुद्धा दर्ता

याम्बु - चलचित्र कबड्डि ४ यथाशिघ्र प्रदर्शन रोक्न माग गर्दै सिन्धुपाल्चोक जिल्ला, लिसन्खुपाखर गाउँपालिका... बाँकी यता

tamang online / June 13, 2022

 Photo Gallery

 Music videos

बिज्ञापनका लागि:
 [email protected]
लेख, रचना र समाचारका लागि:
 [email protected]
सामाजिक संजाल तर्फ:
सर्वाधिकार © 2012 - 2023: Tamang Online मा सार्बधिक सुरक्षित छ. | बिज्ञापन | सम्पर्क | हाम्रो बारेमा Designed by: GOJI Solution