तिहारमा मुलुकभर लोडसेडिङ हुँदैन : कुलमान घिसिङ
काठमाडौं, कात्तिक १४ । नेपाल विद्युत् प्राधिकरणका प्रबन्ध निर्देशक कुलमान घिसिङले तिहारमा मुलुकभर लोडसेडिङ नहुने बताएका छन् । 
बुधबार राजधानीमा मध्य भोटेकोसी जलविद्युत् आयोजनाले सेयर निष्कासनसम्बन्धी गरेको पत्रकार सम्मेलनमा उनले तिहारका बेला १२ सय ७० मेगावाट विद्युत् आवश्यक पर्ने अनुमान गरिएको बताए ।
अनुमानित मागभन्दा धेरै खर्च भएमा पनि धान्नसक्ने वातावरण बनाएको भन्दै उनले तिहारमा कहीँपनि लोडसेडिङ नहुने बताए ।
यो वर्ष गत वर्षको तुलनामा ‘सप्लाइ’ बढाइएको उनको भनाइ छ ।
प्राविधिक कारणले कतै–कतै बत्ती जानसक्ने तर सप्लाइ कम भएर लोडसेडिङ हुने स्थिति नभएको उनले दाबी गरे ।
सिन्धुपाल्चोकमा निर्माणाधीन १०२ मेगावाट क्षमताको मध्य भोेटेकोसी जलविद्युत् आयोजनाले सर्वसाधारण समूहका लागि छुट्याएको सेयर निष्कासन गर्ने जनाएको छ ।
आयोजनाले पहिलो चरणमा कर्मचारी सञ्चयकोषमा सञ्चय गर्ने सञ्चयकर्ताका लागि एक करोड १७ लाख कित्ता सेयर निष्कासन गर्ने भएको छ ।
कम्पनीले सञ्चयकर्ताका लागि यही कात्तिक २८ देखि मंसिर १४ गतेसम्म सेयर निष्कासन गर्नेछ ।
त्यस्तै, संगठित संस्थाका कर्मचारी र ऋणदाता कर्मचारी सञ्चयकोषका कर्मचारीका लागि मंसिर १८ देखि २६ गतेसम्म सेयर निष्कासन गर्ने जनाइएको छ ।
