यसरी गरियो साउदी दूतावासभित्र पत्रकार खशोग्गीको हत्या !
टर्कीको राजधानी इस्तानबुलमा रहेको साउदी अरबको वाणिज्य दूतावास भएको एक जना चर्चित पत्रकारको हत्याको सनसनीपूर्ण खुलासा भएको छ ।
हत्या भएको दिनको सीसीटीभी फुटेजका आधारमा कैयौँ खुलासा भएका छन् । जसमा पत्रकार जमाल खशोग्गीको हत्या भएको दिनमा साउदी अरबले भ्रम पैदा गर्न अपनाएका विभिन्न हर्कतहरुको खुलासा भएको छ ।
अक्टोबर २, २०१८ । बिहानको ११ः ०३ बजे । एक व्यक्ति शर्ट र जिन्स लगाएर आफ्ना केही साथीका साथ दूतावासमा प्रवेश गर्छन् । त्यसको २ घण्टापछि दिउँसो १ बजेर १४ मिनेट जाँदा पत्रकार जमाल खशोग्गी दूतावासमा प्रवेश गर्छन् । उनी दूतावासमा प्रवेश गरेको केही मिनेटमै भित्र साउदी अरबको पूर्व नियोजित षड्यन्त्र सफल हुन्छ ।
न्यूयोर्क टाइम्सका अनुसार अक्टोबर २ मा इस्तानबुलमा रहेको साउदी वाणिज्य दूतावासभित्र जानेबित्तिकै पत्रकार खशोग्गीमाथि आक्रमण हुन्छ र सात मिनेटभित्र उनको हत्या हुन्छ । त्यति मात्रै होइन, २२ मिनेटभित्र उनको शरीरलाई टुक्राटुक्रा पारिन्छ ।
टर्कीका सरकारी अधिकारीका अनुसार पत्रकार खशोग्गीको हत्या गरी साउदी टोली त्यहाँबाट दुई घण्टाभित्रमै बाहिर निस्कन्छ ।
सीसीटीभी फुटेजबाट यो स्पष्ट हुन्छ कि साउदी अरबका हत्यारा एजेन्टहरुले भ्रमपूर्ण अवस्था सिर्जना गर्न खशोग्गीजस्तै देखिने व्यक्ति(बडी डबल) को बन्दोबस्त गरेको थियो ।
हत्यापछि उसलाई खशोग्गीले लगाएकै कपडा लगाइदिइएको थियो । केही समयअघि दूतावास प्रवेश गरेका खशोग्गी त्यहाँबाट फर्किए भन्नलाई यस्तो गरिएको थियो । केही समयसम्म त साउदीको योजना सफल भएको थियो । पत्रकार खशोग्गी दूतावासबाट फर्किए भन्ने कुरा सीसीटीभीमा पनि देखिएको थियो । तर एउटा जुत्ताले हत्याको पुरै षड्यन्त्रको खुलासा भयो । टर्कीले सार्वजनिक गरेको भिडियोमा खशोग्गीजस्तै व्यक्तिलाई उनको हत्या भएको केही समयपछि नै इस्तानबुलको सडकमा हिँडिरहेको देख्न सकिन्छ । केही समयपछि उसले खशोग्गीको कपडा पनि फुकाल्यो ।
कपडा, दाह्री र शारीरिक वनावट दुरुस्तै
खशोग्गीको कपडा लगाएर दूतावासबाट बाहिर निस्कने व्यक्ति उनीजस्तै देखिन्छ । चश्मा र दाह्री पनि उनकै जस्तो छ । उमेर र शरीर हेरेर पनि सबैले खशोग्गी नै भएको लख काट्छन् । तर जुत्ताले भने सबै खुलासा गरिदियो, जुन साउदीले लुकाउन खोजेको थियो । यदि दूतावासबाट निस्किएका पत्रकार खशोग्गी नै हुन् भने उनले किन जुत्ता फेरे भन्न गम्भीर प्रश्न उठ्छ । यदि उनी पत्रकार खशोग्गी होइनन् भने उनको कपडा लगाएर बाहिर निस्कने व्यक्ति को हो त ?
नक्कली व्यक्तिको भयो पहिचान
खशोग्गीजस्तै बनेर दूतावासबाट बाहिर निस्कने व्यक्तिको परिचय मुस्तफा अल मदनीका रुपमा खुलेको छ । मदनी साउदी जाँच टिमको सदस्य भएको र उनलाई खशोग्गीको हत्या गर्न दूतावासमा पठाइएको बताइएको छ । मदनी झण्डै ५७ वर्षका छन् । उनी दूतावासमा जाँदा उनको दाह्री थिएन । उनले अर्कै कपडा लगाएका थिए । उनले स्पोर्ट शुज लगाएका थिए । तर खशोग्गीको हत्या गरेर बाहिर निस्कने बेलामा उनले एउटा गल्ती गरे । उनले खशोग्गीको कपडा र नक्कली दाह्री त लगाए तर जुत्ता भने फेरेनन् । उनी आफ्नै स्पोर्ट शुज लगाएर बाहिर निस्किए ।
खशोग्गी कालो रंगको फर्मल ड्रेस लगाएर भित्र गएका थिए । उनलेका कालो रंगको जुत्ता लगाएका थिए । यो सीसीटीभी फुटेज टर्कीका अनुसन्धानकर्ताका लागि महत्वपूर्ण प्रमाणका रुपमा रहेको छ ।
हत्यामा १५ जना सहभागी
टर्कीका राष्ट्रपतिका निकट एक अधिकारीका अनुसार पत्रकार खशोग्गीको हत्या पूर्वनिर्धारित षड्यन्त्र थियो । योभन्दा पहिले साउदीकै एक वरिष्ठ अधिकारी पत्रकार खशोग्गीसँग सोधपुछ गर्न १५ जनाको टोली खटाइएको थियो । उनीहरुले अक्टोबर २ का दिन खशोग्गीसँग सोधपुछका साथै किडन्याप र ज्यान लिने धम्की दिए । खशोग्गीले विरोध जनाएपछि उनको घाँटी रेटेर हत्या गरिएको र १५ जनामध्ये एक जना उनकै कपडा लगाएर बाहिर निस्किए ।एजेन्सी
***
खशोग्गीको हत्यारालाई कठघरामा उभ्याइनेछ : साउदी अरब
पत्रकार जमाल खशोग्गीको हत्यारा जो भए पनि उसलाई कडा कानूनी सजाय हुने साउदी अरबले जनाएको छ । मङ्गलबार बसेको मन्त्रीपरिषद् बैठकपछि जारी गरिएको विज्ञप्तिमा भनिएको छ, ‘पत्रकार खशोग्गीको हत्यामा सम्लग्न जो कोही भए पनि उसलाई कानूनी दायरामा ल्याइनेछ ।’
राज्य सञ्चालित एसपीए न्यूज एजेन्सीलाई प्राप्त मन्त्रिपरिषद् बैठकपछि सरकारले जारी गरेको वक्तव्यमा भनिएको छ, ‘साउदी अरबले सत्य तथ्य पत्ता लगाउन सम्भावित उपायहरूलाई अवलम्बन गरेको छ र घटनामा प्रत्यक्ष वा परोक्ष रूपमा सम्लग्न सबैलाई कानून बमोजिम सजाय दिइनेछ ।’
खशोग्गीको इस्तानबुलस्थित साउदी अरबेली महावाणिज्य दूतावासमा गएको अक्टोबर २ मा हत्या गरिएको थियो । तर उक्त हत्या कसले र के उद्देश्यले गरेको थियो अझै अनुसन्धानको प्रक्रियामा रहेको छ ।रासस
७ कार्तिक २०७५