काठमाडौँ — किशोरीको बलात्कारपछि हत्या घटनालाई लिएर तनाव बढ्दै गएपछि कञ्चनपुरको प्रमुख जिल्ला अधिकारी (सिडिओ) र जिल्ला प्रहरी प्रमुख (एसपी) लाई प्रहरी प्रधान कार्यालय नक्साल तानिएको छ । यस्तै डीएसपी ज्ञानबहादुर सेठीलाई पनि प्रहरी प्रधान कार्यालय काठमाडौं झिकाइएको छ ।

गृह स्रोत अनुसारप्रमुख जिल्ला अधिकारी कुमारबहादुर खड्का र एसपीदिल्लीराज विष्टलाई सरुवा गरिएको हो।सिडिओ खड्काको ठाउँमा तारानाथ अधिकारी, एसपी विष्टको ठाउँमा कुबेर कठायतलाई पठाइएको छ।

साथै घटनाबारे छानविन गर्नका लागि गृह मन्त्रालयले बिहीबार छानविन समिति गठन गरेको छ। सहसचिव हरिप्रसाद मैनालीको नेतृत्वमा पाँच सदस्यीय छानविन समिति गठन गरेको हो। समितिमा प्रहरी नायव महानिरीक्षक, आन्तरिक मामिला तथा कानुन मन्त्रालय र प्रदेश ७ को प्रतिनिधिसमेत रहने मन्त्रालयले जारी गरेको विज्ञप्तिमा उल्लेख छ।

यसअघि सुदुरपिश्चमका सांसदहरुले उक्त घटनालाई गम्भीर रुपमा लिन र आवश्यक कदम चाल्न माग गर्दै गृहमन्त्री रामबहादुर थापासँग भेट गरेका थिए।

तीन दिनअघि प्रहरीले मानसिक सन्तुलन ठिक नभएका एक जनालाई हत्याको अभियुक्त भन्दै सार्वजनिक गरेपछि स्थानीयस्तरमा आक्रोश चुलिएको समाचार कान्तिपुरमा  छ।

दैनिक प्रदर्शन भइरहेको छ भने बजार तथा सवारी बन्द छ। बिहीबार प्रहरीले चलाएको गोली लागी चार जना घाइते भएका छन् |