केरूङ-काठमाडौं रेलमार्ग बनाउन साढे २ खर्ब रूपैयाँ लाग्ने
चिनियाँ प्राविधिक टोलीले गरेको प्रारम्भिक अध्ययनले केरूङ-काठमाडौं रेलमार्ग बनाउन साढे २ खर्ब रूपैयाँ चाहिने देखाएको छ।जेठ दोस्रो साता चिनियाँ टोलीले गरेको प्रारम्भिक अध्ययनको रिपोर्टअनुसार ७२.२५किलोमिटर लामो रेलमार्ग बनाउन २ खर्ब ५७ अर्ब रूपैयाँ लाग्ने र ९ वर्षमा बन्ने देखिएको रेल वे विभागका सूचना अधिकारी प्रकाशभक्त उपाध्यायले जानकारी दिए।
उपाध्यायका अनुसार चिनियाँ कम्पनी चाइना रेलवे फर्स्ट सर्भे एन्ड डिजाइन इन्स्टिच्युटले गरेको अध्ययनको रिपोर्ट सोमबार सार्वजनिक हुँदैछ।
कम्पनीले सिआनमा हुने एक कार्यक्रममा नेपाली पक्षलाई रिपोर्ट हस्तान्तरण गर्नेछ। सो कार्यक्रममा सहभागी हुन भौतिक पूर्वाधार मन्त्रालयका सचिव मधुसुदन अधिकारी नेतृत्वको टोली चीन पुगेको छ।
‘अहिले नै विस्तृत विवरण आइसकेको छैन। उहाँहरूले रिपोर्ट ल्याएर आएपछि धेरै कुरा थाहा हुन्छ,’ उपाध्यायले भने।उनका अनुसार चिनियाँ अध्ययन प्रतिवेदनमा यो रेलमार्गको ९८.५ प्रतिशत भागमा पुल र टनेल हुने उल्लेख गरिएको छ। प्रारम्भिक अध्ययनको सबै खर्च चिनियाँ पक्षले नै ब्यहोरेको थियो।
असार पहिलो साता चीन भ्रमणमा गएका प्रधानमन्त्री केपी शर्मा ओलीसँगको भेटमा राष्ट्रपति सी चीनफिङले चिनियाँ रेल काठमाडौं पुग्नेमा आफू विश्वस्त रहेको बताएका थिए। सोही भेटमा उनले अधिकारीहरूलाई त्यसको सम्भाव्यता अध्ययन छिटो सक्न निर्देशन दिइसकेको पनि बताएको सेतोपातिमा छ |