नेकपा निकट अनेरास्ववियूको एकता प्रक्रिया टुङ्गियो, ४ सय ९९ सदस्य केन्द्रीय कमिटी बन्ने
काठमाडौं– पूर्वएमाले समर्थित अनेरास्ववियु र पूर्व माओवादी केन्द्र निकट अनेरास्ववियु (क्रान्तिकारी) बीच एकता प्रक्रियाको टुङ्गो लागेको छ। एकता प्रक्रियाको लागि गठित कार्यदलले एकीकृत संगठनको नाम र केन्द्रीय समितिको टुंगो लगाएको हो।
नवगठित संगठनको नाम अनेरास्ववियुको ‘यु’ लाई दीर्घ (यू) लेख्ने सहमति भएको छ भने ४ सय ९९ सदस्यीय केन्द्रीय कमिटी रहने भएको छ। अब नेकपाको विद्यार्थी संगठनको नाम अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियू) हुने भएको छ।
४ सय ९९ केन्द्रिय समितिमा अनेरास्ववियुबाट २ सय ६० जना र क्रान्तिकारीबाट २ सय ३९ जनाले प्रवेश पाउने भएका छन्। संगठनको नेतृत्व कार्यदलले टुङ्गो लगाउन सकेको छैन। अर्को बैठकमा नेतृत्वको समेत टुंगो लगाइने कार्यदलले जनाएको छ।
विद्यार्थी संगठन एकताका लागि गठित कार्यदलमा रविन्द्र अधिकारी, रमेश मल्ल, नविना लामा र रन्जित तामाङ सदस्य रहेका छन्।