एनपी परदेशी , न्युयोर्क | अमेरिकामा उच्च शिक्षा हासिल गरेका ११ जना तामाङ युवाहरुलाई सम्मान गर्दै उनीहरुला‌ई बिभिन्न क्यारीअर सन्दर्भमा छलफल गरी सहयोग पुराउँने उध्देश्य राखी तामाङ समाज न्युयोर्कले हालै एक कार्यक्रमको आयोजना गर्यो । गत जुलाईको २९ तारिक आईतबार न्युयोर्क स्थित ज्याक्सन हाईटमा उक्त कार्यक्रमको सम्पन्न भयो ।

न्युयोर्क राज्यमा बसोबास गरी सन २०१८ मा एसोसिएट डिग्री वा सो भन्द माथि हासिल गरेका ११ जनालाई सम्मान गरिएको हो । सम्मानित हुनेहरुमा मास्टर्स डिग्री पुरा गरेका अमृत लामा थिए भने ब्याचलर डिग्री पुरा गरेका मरिना तामाङ, उमा लामा, करुणा लामा, निलिमा रुम्बा र एन्जेला गरी पाँच जना थिए । त्यसैगरी तेन्जी योन्जन, सरीता लामा, साङ्मो लामा, तेन्जिङ योन्जन र सोनिका लामाले एसोसिएट डिग्री पुरा गरेका थिए ।

उच्च शिक्षासँगै अमेरिकामा कसरी आफूले चाहेको क्षेत्रमा क्यारीअरको विकास गर्दै जाने भनेर छलफल गर्न बिभिन्न क्षेत्रमा सफल्ता हासिल गरेका नौ जनाले आफ्नो क्षेत्रको बारेमा अनुभवहरु सुनाएका थिए । कार्यक्रम तालिका अनुसार डाक्टर बर्षा मोक्तान, डाक्टर आसमान लामा, कम्प्युटर ईन्जिनियर रोशन लामा, ईलेक्ट्रिक ईन्जिनियर समीर तामाङ, लाग्वार्डिया कम्युनिटी कलेजका सल्लाहकार प्रविन मोक्तान, युवा व्यवसायी पवन मोक्तान, पुर्व मिस तामाङ (२०१३) लाक्पा तामाङ लगायतले क्यारिअर विकास सम्बन्धी अनुभवहरु सुनाए ।

आयोजक सँस्थाका सचिव दिपेन्द्र लामाका अनुसार तामाङ युवा जगतलाई उच्च शिक्षासँगै क्यारिअरमा अगाडी बढ्न उत्साह जगाउँने कार्यक्रमको प्रशंसा गर्दै प्रोफेसर क्याथरिन मार्च, सांसद नविना लामा, नेपाली सेनाका कर्णेल तथा गीतकार डाक्टर आश बहादुर तामाङ, जापानका लागि पूर्वराजदूत तथा समाजसेवी गणेश योन्जन, बिमान चालक सिनियर क्याप्टेन तथा कलाकार बिजय लामा लगायतले सफल्ताको लागि शुभकामना पठाएका थिए । कार्यक्रममा उपस्थित गैह्रअावासीय नेपाली सँघ, राष्ट्रीय समन्वय परिषद अमेरिकाका महासचिव बाबुराम लामा, तामाङ समाज उत्तर अमेरिकाका अध्यक्ष लक्यान लामा, संस्थापक अध्यक्ष सुवास लामा, पूर्वअध्यक्षहरु राम तामाङ, सूर्य पाख्रिन लगायतले शुभकामना मन्तब्य राखेका थिए । बिध्यार्थी सम्मान कार्यक्रमलाई प्रत्येक बर्ष नियमित गर्ने कार्य्रमका सभापति तथा आयोजक संस्थाका अध्यक्ष गोमा योन्जनले बताईन् ।

चरणबध्द सँचालित कार्यक्रमको सँचालन आयोजक संस्थाका सचिव दीपेन्द्र लामा, सह-सचिव रोज लामा लगायत कार्यक्रमका संयोजक छिरिङ योन्जनले पालै पालो गरेका थिए । कार्यसमिती सदस्य नुर्बु तामाङले स्वागत मन्तब्य दिएका थिए । आयोजक संस्थाका कार्यसमिती सदस्यहरु निकै खटेर लागेका कार्यक्रम अत्यन्तै राम्रो र अर्थपुर्ण रहेको उप‍स्थित सहभागीहरुले बताए भने सामाजिक सञ्जालमार्फत बिश्वभरबाट प्रशंसा गरेका छन् ।