अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच मंगलबार बिहान अभूतपूर्व शिखरवार्ता सुरु भएको छ। सिंगापुरको स्थानीय समयानुसार बिहान ९ बजे दुवै नेताले हात मिलाएर वार्ता सुरु गरेका थिए।

मलाई लाग्छ, यो वार्ता अभूतपूर्व रुपमा सफल हुनेछ। यो मेरो लागि सम्मानको कुरा हो र हाम्रो सम्बन्ध गज्जबको हुनेछ,’ ट्रम्पले भने।

किमले भने, ‘यहाँसम्म आइपुग्न सहज थिए। हामीलाई विगतले पछाडि अँठ्याइराखेको थियो। विगतका अभ्यास र धारणाहरुले हाम्रो आँखा र कान छोपेका थिए। तर आज यहाँ आइपुग्न हामीले ती सबै कुरालाई पछाडि छोडेका छौँ।’

त्यसपछि करिब ४० मिनेट किम र ट्रम्पले एक्लाएक्लै वार्ता गरेका थिए।

एक्लाएक्लैको वार्तापछि दुवै नेता गम्भीर मुद्रामा साथमै होटलमा देखा परे र बैठक कक्षमा प्रवेश गरे।

‘मलाई लाग्छ, पूरै संसार यो क्षणलाई नियालिरहेको छ। संसारका धेरै मानिसले कुनै काल्पनिक कथा वा साइन्स फिक्सन मुभीको दृश्य ठान्नेछन्,’ किमले दोभाषेमार्फत् भने।

दुई नेताबीचको वार्ता कस्तो रह्यो त भन्ने प्रश्नमा ट्रम्पले भने, ‘अति राम्रो, अति राम्रो। राम्रो सम्बन्ध।’

‘मलाई विश्वास छ, यो शान्तिका लागि राम्रो प्रस्तावना हो,’ किमको प्रतिक्रिया थियो।

वर्किङ लञ्च

ऐतिहासिक सिंगापुर शिखरवार्तामा भाग लिइरहेका अमेरिकी र उत्तर कोरियाली नेताहरुको ‘वर्किङ लञ्च’ को मेनु सार्वजनिक भएको छ।

स्थानीय समयअनुसार ११ः५० मा सुरु भएको लञ्चको सुरुवातमा प्राउन ककटेल, एभोकाडो सलाद, ओइसियोन भनिने हरियो आँपको परिकार राखिएको छ।

मेन कोर्समा बिफ सर्ट रिब कनफिट, क्रिस्पी पोर्क र याङजाउ फ्राइड राइस छ।

अन्तमा डार्क चकलेट, भेनिला आइसक्रिम र पेस्ट्री राखिएको छ।

एजेन्सी