तेलअविव – बिश्व शान्तिको अग्रदुत तथा अहिंसाको प्रतिक भगवान बुद्धको २५६२ औं बुद्ध जयन्ती समारोह गत (शनिबार) नेपाली राजदूताबास इजरायलको आयोजनामा ,इजरायल स्थित ४१ वटा संघसंस्थाहरुको सहआयोजक र इजरायलबाट संचालित अनलाइन मिडियाहरुको सहयोगमा भव्यताको साथ सम्पन्न भएको छ |

बुद्ध जयन्ती समारोहमा उपस्थित सम्पूर्ण महानुभाव हरुलाई नेपाली दुतावास इजरायलका उपनियोग प्रमुख तथा काउन्सिलर आस्था सुव्बाले स्वागत गर्नु हुदै कार्यक्रम संचालन गर्नु भएको थियो |

लामा धर्मगुरु थुप्तेन योन्जन तामाङ र वहाँको सहयोगी लामाहरु द्वारा बौद्ध धर्मअनुसार पाठपुजा गरी सुरु गरेको कार्यक्रम नेपाली दुतावास इजरायलका महामहिम राजदुत निरञ्जन थापा,नेपालबाट इजरायलमा भ्रमणमा आउनु भएका नेपालको पूर्व अर्थमन्त्री सुरेन्द्र पाण्डे , एसिया प्रान्तीय महामहिम राजदुतहरु , इजरायली पर्यटन व्यवसायीहरु संगै इजरायलमा बसोवास गर्नु हुने नेपालीहरुको उपस्थित रहेको थियो |

कार्यक्रममा प्रमुख अतिथि पूर्व अर्थमन्त्री सुरेन्द्र पाण्डेले गौतम बुद्धको जन्मस्थल लुम्बिनी र नेपाल भ्रमणको लागि बिदेशी पाहुनाहरुलाई अनुरोध गर्नु भएको थियो |
कार्यक्रममा चेतन पन्तले तयार पार्नु भएको बुद्धको जीवनी र लुम्बिनीको जानकारी सहितको डकुमेन्टरी प्रदर्शनी गरेको थियो |
नेपाली पहिचान झल्किने विभिन्न जातजातिको भेषभुषामा नृत्य र फूलको आँखामा फूलै संसार गीत गायिका पेमा पाख्रिन तामाङ,सिता घिसिङ र उर्मिला लामा पाख्रिन तामाङले प्रस्तुत गरेका थिए |

कार्यक्रमको अन्तमा सम्पूर्ण पाहुनाहरुलाई प्रशाद वितरण गर्नुको साथै शान्ति र्याली गरेका थिए |