भैरहवा — निर्माण सुरु भएको केही महिनापछि भूकम्प, मधेस आन्दोलन, नाकाबन्दी, ठेकेदार र सहठेकेदारबीच विवादले सुस्ताएको गौतम बुद्ध अन्तर्राष्ट्रिय विमानस्थल आयोजनाले गति लिएको छ ।

आयोजनाले गति लिएपछि निजी लगानीकर्ता उत्साहित बनेका छन् । अहिले धावनमार्ग, टर्मिनल भवन र कन्ट्रोल टावर निर्माण धमाधम चलिरहेको छ ।

‘अबको एक वर्षमा आयोजनाको सम्पूर्ण संरचना पूरा गर्ने लक्ष्यका साथ निर्माणकार्य अघि बढेको छ,’ गौतम बुद्ध अन्तर्राष्ट्रिय विमानस्थल आयोजना प्रमुख ओम शर्माले भने, ‘सन् २०१९ को जुनभित्र आयोजनाको संरचना सम्पन्न हुनेछ ।’ सन् २०१९ लाई ‘अप्रेसन इयर’ (सञ्चालन वर्ष) का रूपमा घोषणा गरिने उनले जनाए । टर्मिनल भवनको छाना र धावन मार्गको पिचको कार्ययोजना निर्धारण गरिएको छ । जसअनुसार आउँदो मंसिरसम्ममा टर्मिनल भवनको छाना हालिसक्ने र फागुनसम्ममा धावन मार्गको पिच सम्पन्न गर्ने गरी कार्ययोजना निर्धारण गरिएको हो । हाल धावनमार्गमा सबवेसको काम सकिएर बेसकोर्सको काम सुरु भएको छ । बेस कोर्सको काम दुई महिनाभित्र पूरा भएपछि पिचको काम थालिनेछ ।

टर्मिनल भवनको पहिलो र दोस्रो स्लाब ढलानको काम असारभित्र सक्ने र त्यसपछि छानाको काम मंसिरमा सक्ने गरी निर्माणकार्य अघि बढेको छ । अन्डरग्राउन्डसहित ८ तले कन्ट्रोल टावर एक सय दिनभित्र सक्ने गरी निर्माणकार्य जारी राखिएको छ । कन्ट्रोल टावरको निर्माण कार्य रातमा समेत गर्ने गरी मिलाइएको छ । ‘यही गतिमा निर्माणकार्यले निरन्तरता पाउनेमा हामी विश्वस्त छौं र अब निर्धारित समयमा आयोजना पूरा हुने गरी कामले तीव्रता पाएको छ,’ शर्माले भने, ‘बरु विमानस्थलको संरचना पूरा भएपछि सञ्चालन कसरी गर्ने ? भन्नेतर्फ सम्बन्धित निकायले आवश्यक पूर्वाधारका लागि गृहकार्य सुरु गर्न जरुरी छ ।’ उनका अनुसार आवश्यक संरचना तयार भएपछि विमानस्थल सञ्चालनमा ल्याउनका लागि आवश्यक पर्ने सुरक्षा व्यवस्था, उडान सञ्चालन गर्नका लागि एयरलाइन्सको खोजी, एयर रुट लिनेलगायत अन्य व्यवस्थापकीय तयारी सुरु गर्ने समय नजिक आइसकेको छ ।

आयोजनाको काम बीचमा शिथिल बनेपछि चिनियाँ ठेकेदार कम्पनी नर्थवेस्ट सिभिल एभिएसन एयरपोर्ट कन्ट्रक्सन ग्रुपले गत सेप्टेम्बरमा नयाँ व्यवस्थापकसहितको टिम परिवर्तन गरेको थियो । आयोजनास्थलमा हाल दैनिक ७० जना चिनियाँ प्राविधिक तथा कामदारसहित २ सयभन्दा धेरै कार्यरत छन् । वर्षायाममा निर्माण कार्य नरोकिने गरी आवश्यक नदीजन्य निर्माण सामग्री सञ्चित गरिएको छ । सम्झौताअनुरूप कार्य प्रगति नभएकामा असन्तुष्टि जनाउँदै आयोजनाको मुख्य लगानीकर्ता एसियाली विकास बैंकले लगानी रोक्ने चेतावनीसहितको पत्र पठाएपछि आयोजनाबारे आम जनता अन्योलमा थिए ।

पछिल्लोपटक आयोजनाको कामले गति लिएपछि अहिले बैंक पनि सकारात्मक देखिएको छ । गत डिसेम्बरदेखि भुक्तानी रोकेको एडीबीले मार्च र अप्रिलमा आयोजनास्थलमा आई अनुगमन र निरीक्षण गरेको थियो । आयोजनाले पछिल्लो समयमा गति लिएपछि निजी लगानी क्षेत्रमा पुन: उत्साह थपिएको र यस क्षेत्रको पर्यटन उद्योगमा लगानी बढ्न थालेको सिद्धार्थ उद्योग वाणिज्य संघका अध्यक्ष कुलप्रसाद न्यौपानेले बताए । ‘बीचमा आयोजनाको काम शिथिल हुँदा लगानीकर्तामा नैराश्यता छाएको थियो,’ न्यौपानेले भने, ‘पछिल्लो समयमा आयोजनाले गति लिएपछि निजी क्षेत्र उत्साहित बनेको छ र विशेषगरी यातायात र होटलमा लगानी बढ्न थालेको समाचार  कान्तिपुरमा छ |

प्रकाशित : वैशाख २१