काठमाडौ । नेपालकी प्रथम महिला सगरमाथा आरोही राष्ट्रिय विभुती पासाङ्ग ल्हामु शेर्पाको प्रतिष्ठा दिवस एवं रजत जयन्तीको उपलक्ष्यमा नेपाली खेलकुद पत्रकारिता क्षेत्रमा निरन्तर कलम चलाई रहेका मकवानपुरका युवा खेल पत्रकार सुमन भाेम्जनको २०७२ साल बैशाख १२ गते आएको महा बिनासकारी भूकम्पमा परि ज्यान गुमाएका सुमन भाेम्जनको स्मृतिमा नेपाल क्लाइम्विङ स्पोर्ट एसोसिएसन र पासाङ्ग ल्हामु प्रतिष्ठानले संयुक्त रुपमा आयोजना गरेको सुमन भोम्जन मेमोरियल स्पोर्ट क्लाइम्विङ प्रतियोगिता सम्पन्न भएको छ ।

बुधबार राजधानीको पासाङ्ग ल्हामु स्पोर्ट क्लाइम्विङ्ग सेन्टर धुम्वराहीमा सम्पन्न भएको प्रतियोगिता लिड क्लाइम्बिङ महिला तर्फ अनिशा जिरेल र पुरुष तर्फ सिद्धार्थ केसीले स्वर्ण पदक जितेका छन् ।

महिला तर्फ जुई थापा मगर रजत जित्दा अनिता खत्री कास्य पदक हात पारिन् ।

त्यसैगरी पुरुष तर्फ अनुप मल्ल र युवराज शाहीले रजत पदक र कास्य पदक जितेका छन् । त्यसैगरी प्रतियोगिताको टप रोप क्लाइम्बिङको महिला तर्फ स्वस्तिका चौधरीका स्वर्ण, बेनिसा राजबहाक रजत जित्दा विमला सुनारले कास्य पदक जितेकी छिन् । टप रोप क्लाइम्बिङको पुरुष तर्फ पेम्वा शेर्पाले स्वर्ण, भिम तामङले रजत जित्दा विजय सुनार कास्य पदक जितेका छन् ।

प्रतियोगितामा लिड क्लाइम्बिङ र टप रोप क्लाइम्बिङ गरी दुई विधामा ६० खेलाडीहरुले प्रतिस्पर्धा गरेको नेपाल क्लाइम्बिङ स्पोर्ट एसोसिएसनका महासचिव मेघराज पौडेलले जानकारी बताए । लिड क्लाइम्बिङ तर्फका विजेता महिला पुरुष खेलाडीहरुले नगद १५ हजार, १० हजार र ५ हजार नगत रुपैयाँका साथै मेडल, प्रमाणपत्र प्राप्त गर्दा, टप रोप क्लाइम्बिङका विजेता खेलाडीहरुले मेडल, प्रमाणपत्र मात्रै प्राप्त गरे ।

प्रतियोगितालाई नेपाल खेलकुद पत्रकार मञ्चको सहकार्यमा संचालन गरिएको थियोे । प्रतियोगिताका बिजेता खेलाडीहरुलाई नेपाल ओलम्पिक कमिटीका अध्यक्ष एवं प्रतिनिधी सभाका सदस्य जिवन राम श्रेष्ठले पुरस्कार वितरण गरेका थिए । न्युज २४ नेपाल  बाट |