१८ वैशाख, काठमाडौं । प्लान इन्टरनेसनल नेपालले आगामी ५ वर्षभित्र १० लाख किशोरीमाझ पुगेर उनीहरुको शिक्षा, स्वास्थ्य लगायतका क्षेत्रमा सघाउने प्रतिबद्धता जनाएको छ । बालबालिका, उनीहरूका परिवार र समुदायका लागि विभिन्न कार्यक्रम गर्न थालेको ४० बर्ष पुगेको अवसरमा प्लानले यस्तो योजना बनाएको हो ।

चार दशकको अवधिमा संस्थाले सरकारी र गैरसरकारी साझेदारसँगको समन्वयमा नेपालका ५० जिल्लामा विभिन्न कार्यक्रम कार्यान्वयन गरिसकेको जनाएको छ ।

प्लान इन्टरनेसनल नेपालले बालबालिकाको शिक्षा, स्वास्थ्य, परिवारको जीविकोपार्जन, खानेपानी, सरसफाई, किशोरी र महिलाहरूको सशक्तिकरण तथा विपद् जोखिम न्यूनीकरणका क्षेत्रमा काम गर्दै आएको हो ।

प्लान इन्टरनेसनल नेपालका राष्ट्रिय निर्देशक स्भेन कोपेन्स्ले भने ‘नेपालका बालबालिका र समुदायसँगको हाम्रो यात्राले चार दशक पार गरेको छ र यो यात्रा साँचो अर्थमा प्रेरणादायी र उदाहरणीय छ ।’

प्लान इन्टरनेशनल नेपालको ४० औं बाषिर्कोत्सवका कार्यक्रमहरू वैशाख १८ गतेबाट सुरू भए पनि आगामी १२ महिनाभित्र विभिन्न कार्यक्रमहरू आयोजना गरिनेछ ।

स्थापनाकालदेखि नै प्लान इन्टरनेसनल नेपालले सरकारबाट अनुमति प्राप्त गरी गैरसरकारी संस्थासँगको समन्वयमा काम गर्दै आएको छ ।

यस पृष्ठभूमिमा प्लान इन्टरनेसनल नेपालले ५ बर्षे नयाँ राष्ट्रिय रणनीति अनुसार नेपालमा बालबालिकाले भोग्नुपरेका समस्या न्युनीकरणका लागि सबै परियोजनालाई केन्दि्रत गरिनेछ र आगामी ५ बर्षमा १० लाख किशोरीमाझ पुगेर उनीहरूको जीवनमा परिवर्तन ल्याउने लक्ष्य राखेको छ ।

प्लान इन्टरनेसनल नेपालले विकट र पिछडिएका क्षेत्रमा ५ वटा रणनीतिक बिषयमा आफ्नो स्रोत परिचालनलाई निरन्तरता दिनेछ ।

प्रारम्भिक बालविकास र अभिभावकीय शिक्षाको सम्वर्द्धन, लैङ्गिक रूपान्तरण र समावेशी शिक्षाको प्रवर्द्धन, बालविवाह, बाल श्रम, बालबालिका बेचविखन र किशोरीहरूलाई प्रभावित गरिरहेका हानीकारक अन्य अभ्यासहरू न्युनीकरणका लागि समुदाय केन्द्रित बाल संरक्षण संयन्त्रहरू निर्माण, किशोरीहरूको सशक्तिकरण र उनीहरूको नेतृत्वका लागि पैरवी, विपद् जोखिम न्युनीकरण तथा खानेपानी, सरसरफाइ र स्वच्छता कार्यक्रममार्फत् समुदाय स्तरमा उत्थानशीलता निर्माण लगायतमा स्रोत परिचालन गरिने अनलाइनखबरमा छ |

२०७५ वैशाख १८ गते