टीपीएस खारेज गरी करिब ९ हजार नेपालीलाई देश निकाला गर्ने तयारीमा अमेरिका
काठमाडौं । अमेरिकाको डिपार्टमेन्ट अफ होमल्याण्ड सेक्युरिटीले नेपाली नागरिकलाई दिँदै आएको टेम्पोररी प्रोटेक्टेट स्टाटस् (टीपीएस) खारेज गरी उनीहरुलाई नेपाल फर्काउने तयारी गरिरहेको समाचार प्रकाशित भएको छ ।
अमेरिकाको चर्चित मिडिया ‘द वासिङट्न पोष्ट’को अनलाइन संस्करणमा उल्लेख भए अनुसार अब चाँडै अमेरिकी सरकारले करिब ९ हजार नेपालीलाई देश निकालाको तयारी गरिरहेको छ ।
नेपालमा सन् २०१५ मा आएको विनाशकारी भूकम्पको कारण देखाउँदै तीन वर्षअघि अमेरिकी सरकारले ‘अनडकुमेन्टेड’ अवस्थामा बसोबास गरिरहेका नेपालीहरुलाई टीपीएस सुविधा दिएको थियो । अब उक्त सुविधा खारेजीको तयारीमा अमेरिकी सरकार लागिपरेको जनाएको छ । त्यसको लागि नेपाल फर्कनको लागि अमेरिकाले १ वर्षको समय दिने बताइएको छ ।
अवैधानिकरुपमा अमेरिका बसोबास गरिरहेका विदेशीलाई स्वदेश फर्काउने ट्रम्प प्रशासनको अभियानको पछिल्लो मारमा नेपालीहरु परेका छन् । ट्रम्प प्रशासनका हार्डलाइनरहरुले पहिलेदेखि नै टीपीएस सुविधा खारेजीमा जोड गरिरहेका थिए । टीपीएस सुविधा लामो समयका लागि दिन नसकिने र यसको प्रयोजन त्यस्तो नभएको उनीहरुको भनाइ छ ।
नेपालीको टीपीएस खारेज गर्ने दस्तावेजमा विभाग सचिव क्रिश्जेन नेल्सनले हस्ताक्षर नगरिसकेको भए पनि आन्तरिक दस्तावेजले चाडै नै उनले हस्ताक्षर गर्ने स्पष्ट संकेत गरेको वासिङटन पोष्टमा उल्लेख छ ।
