इजरायल । इजरायलले सामूहिक रूपमा अफ्रीकी आप्रवासीहरुलाई देशबाट निकाल्ने योजना रद्द गरेको छ।
प्रधानमन्त्री बेन्जामिन नेतान्याहुको कार्यालयले १६ हजार शरणार्थीलाई पश्चिमा देशहरुमा पठाइने जनाएको छ।

बाँकी रहेका करिब १८ हजारलाई इजरायलमै स्थायी बस्न दिइने भनिएको छ।

आईतबारबाट देश निकालाको काम हुने भनिएकोमा त्यहाँको सर्वोच्च अदालतले त्यसलाई रोकिदिएको थियो।

इजरायलका अभियानकर्मीहरुले युगाण्डा तथा रूवाण्डा जस्ता देशका ती आप्रवासीलाई फिर्ता पठाउने योजनाको विरोध गर्दै आएका थिए।

जनवरीमा भएको निर्णयमा आप्रवासीलाई निश्चित रकम र प्लेन टिकट दिएर स्वैच्छिक फर्कन दिने वा नमाने जबरजस्ती हटाउने भनिएको थियो। तर सो निर्णय इजरायलभित्रै विवादास्पद रह्यो।

देशभित्रका आलोचक तथा बाहिर रहेका यहुदी समुदायले उक्त योजना इजरायलको अन्तर्राष्ट्रिय छविमा दाग भएको बताएका थिए।

अब नयाँ योजना पाँच वर्षको अवधिमा लागू हुनेछ। उक्त सम्झौतालाई प्रधानमन्त्री नेतान्याहुको कार्यालयले अभूतपूर्व भनेको बीबीसीले जनाएको छ।

२ मे २०१८